慢煮工業 (已結業)

一向都好少去旺角太子，觉得人多车多，但系同事介绍吓佢哋去呢一间慢煮工业试吓。可能因为都少去，比想像之中难揾，原来间餐厅系几间车房之间，但系当你行到去𠮶条街都几难Miss，因为餐厅布置得非常之有心思非常之靓。当日就叫咗一人叫咗一个set lunch，我就叫咗安格斯牛扒薯条，虽然餐厅嘅价钱亲民，但系安格斯牛扒煮得一啲都唔马虎，食落肉质非常鲜嫩易咬，牛扒肥瘦适中，唔会无啦啦有好大块肥膏或者筋。薯条炸到金黄香口，多士就加咗少少蜜糖。朋友就叫咗满蚬肉蝴蝶意粉，本身都唔系好明白咩叫满蚬肉，嚟到就即刻秒懂。都冇乜试过食意粉蚬肉会多过意粉，虽然平时唔系特别钟意食汤意粉，但系今次嘅汤真系非常之出色，充满着蚬肉嘅鲜味，食完都忍唔住继续饮。另外叫咗一个慢煮伯爵茶啤梨配雪糕一齐食，都未试过食呢种煮法嘅啤梨，有啤梨嘅清甜之余又有伯爵茶味，雪糕有几种唔同嘅味道可以拣，我哋就拣咗玄米茶雪糕，味道好新鲜。餐饮用咗Twinings 伯爵茶，饮完再冲多一杯都仲好够茶味。