飯丸屋 (D2 Place TWO) (已結業)

之前见有人话荔枝角系美食沙漠，最近工作需要去多咗𠮶头，慢慢发现其实都有好多好西等我哋发掘。就好似今日想买啲轻便啲嘅外卖，去到D2 Place比我见到呢间味道卖相都非常精美嘅饭丸屋饭团专卖店。所有饭团都系即场新鲜制造，望住佢整嘅过程都几兴奋又期待。买咗两个餐，一份自己食，一份帮朋友买。我就拣咗日式炸鸡饭团配黑糖豆浆。有相为证，啲炸鸡涨啵啵大大粒，肉哋都好厚实，仲有午餐肉同蛋做配料，每啖都好满足。另一款就叫咗明太子干贝酥饭团，卖相同样靓到忍唔住要打下卡，好大件嘅干贝酥，暖笠笠咁食落口真系好舒服。明太子酱嘅味都好浓郁，同饭团本身非常夹。黑糖豆浆同黑芝麻豆浆用细杯装真系超级可爱，cute到忍唔住要影多几张相。两款嘅卖相都有渐层效果，睇落非常吸引，味道同样无得弹。薯条炸得好笔挺爽直，咬落口好干脆，配埋明太子酱一流！麻糬波波有两款口味，普通甜番薯同紫薯两种颜色。食落去嘅口感一致地外脆内软，系好正嘅小食。