Sage Bar

营业中

休息中

自从搬离元朗之后都差唔多有半年无返过嚟，适逢今日要返嚟攞信，又发现以前成日同个仔行过嘅呢条街开咗间咁靓仔嘅西餐厅，就过嚟撑下枱脚。餐厅环境唔错，门面超特濶，以元朗嚟讲简直可以话系数一数二。Caesar Salad 凯撒沙律，沙律菜新鲜，配以经典嘅凯撒沙律汁，用油醋餐包衬住凯撒沙律一齐食，相得益彰。Carbonara 风干猪面颊肉・乌鱼子・芝士意粉，意粉酱汁浓稠，极富蛋味，乌鱼子散落喺酱汁当中，起咗提鲜嘅作用，我地极速清哂。Sage Suckling Pig Roulade 乳猪卷・苹果酸辣酱・鼠尾草烧汁，乳猪卷外皮非常香脆，里面包住嘅除咗有搅碎咗嘅猪肉之外，白色一粒粒嘅竟然系薏米，令到整体口感非常特别，腌过嘅苹果酸辣酱同香脆嘅乳猪皮非常配衬。Home Made Gelato 自制意式雪糕，最后嚟到甜品环节有呢个我称之为好特别嘅鸳鸯双糕，右手边嘅系餐厅自家制柠檬 Gelato，酸酸甜甜对味蕾极尽刺激；而左手边嘅系 salted caramel 雪糕，经典嘅焦糖同奶味又能够抚平你嘅味蕾，系心太软呢一类冰火甜品以外嘅两极甜品，值得一试。