紅樹林 (已結業)

星期日凌晨我挨更抵夜睇阿根廷对墨西哥嘅比赛，估唔到要打到加时先可以收工。踢完差唔多成六点，一觉瞓到成两点几，好彩友人借宿一宵，使到我可以同阿K食番个tea。原来阿K煲电视剧煲到差唔多成五点钟，我上到佢屋企仲瞓紧。冇坏，梳洗完啱啱好食得tea。阿K话想去陈意斋买口“立”湿，所以我地经过呢间餐厅。呢间餐厅原来有直播世界杯十六强头场赛事。厢座好阔、舒适，坐到我昏昏欲睡。我地各自嗌咗tea set，阿K叫咗海鲜炒意粉，我就叫咗薄饼饱。碟海鲜炒意粉麻麻地，太湿，应该啲急冻海鲜冇出水就落镬炒。搅到啲意粉淋“谢谢”。薄饼饱就比较好，面包唔会焗得太硬，配料有火腿、芝士、洋葱等标准嘢，唔花巧，作为一份轻便嘅tea不俗。我地一路食tea，一路睇住大电视播放有线陈年旧片，由谭校长主演嘅“黄飞鸿笑传”，笑吓、食吓，轻轻松松好自在。埋单五十有找，都觉得唔错。