辦館 (雅蘭中心) (已結業)

趁放假去开雅兰中心买嚟紧嘅露营用品，行到攰攰又喺时候揾食。行上一层见到办馆㖞，上次喺铜锣湾食过都相当唔错，再望望A姐攰到黑面嘅样，唔理喇，为求自保，即刻坐低开餐。黑松露油芝士多士：拎埋位已经闻到香喷喷嘅松露香味。食落口，芝士味相对较淡，但咁样反而唔会抢走松露嘅味道，两者配合得啱啱好！加上面包烘到好松脆，作为下午茶嘅选择相当唔错。沙嗲安格斯牛捞丁：沙嗲牛肉面成日都食到，但沙嗲安格斯牛捞丁，你又听过未？上枱一刻已经被麻油味深深吸引住，而切成粒状嘅牛肉，牛味浓又够嫩滑，沙嗲汁同半生熟蛋捞埋一丁，直头系享受，不过就略嫌沙嗲汁相对较少。棉花糖多士：直头系邪恶首选！将多士同棉花糖放入焗炉，微焗至棉花糖轻焦，再淋上朱古力酱，对于A姐嚟讲，简直系人间极品！红豆菠萝油：A姐话我食菠萝油好麻甩，但松软嘅菠萝包夹上厚切牛油，再加埋大大粒红豆，其实每一啖都系邪恶嘅化身呀！红豆鲜奶抹茶：浓浓嘅抹茶香，再加埋大大粒红豆，配合得好好，又唔甜，十足十饮紧宇治金时！