Spade by Lassana (已結業)

餐厅是开放形式，冇焗促感。旁边仲有大大嘅玻璃窗可以欣赏晚霞，食得轻松自在。餐厅其实有好多SET选择，但啲餐牌散收收，建议餐厅有系统啲整返本餐牌，等食客一目了然。我哋2人点咗【澳洲特厚和牛汉堡配粟米碎蛋沙律】同埋【热窝夫全日早餐】，仲有两杯热茶。【热情果蜜桃香草茶】- 用TWININGS茶包冲嘅，闻到好香甜嘅热情果、蜜桃味，记得泡耐啲，啲味道先会走出嚟。【柠姜香草茶】- 柠姜醒胃，餐前饮就啱晒。【澳洲特厚和牛汉堡】面包外面皮脆，里面就非常松软。配搭鸡蛋沙律感觉新鲜。一夹啲蛋汁就慢慢流出嚟，沾咗蛋汁成个包就更好食。汉堡真系够厚，肉汁丰富，汉堡肉入面有洋葱粒所以食落都香口。份量非常足够，食完成个包都饱晒。【热窝夫全日早餐】主角窝夫非常香脆，上面有糖霜又有蜜糖，两种甜一齐味道加倍。肠同烟肉味道适中，唔会过咸。炒蛋亦好香滑。甜粟米好多，不过个人钟意食再甜啲嘅粟米。【单球雪糕窝夫】士多啤梨味嘅雪糕，味道天然，唔会好似瑞士糖𠮶只士多啤梨味咁人工。下面个窝夫原本系牛角窝夫嚟，不过冇晒材料所以用咗普通窝夫，不过都够晒香脆可口。我钟意呢度食嘢够悠闲，周末周日同朋友一齐嚟一路倾计一路食，消磨吓时间就啱晒。