同人鍋 (已結業)

天气开始凉啦，即刻出动去烚烚下，平时去尖沙咀揾食都会觉得又多人又迫，今次俾我揾到间环境清静，仲有西餐厅feel既火锅放题，可以电话预约，咁就唔怕等餐蒙啦。餐厅位于内街，地下系接待处，上一层楼梯就到用餐区。装修好有Cafe味道，空间感十足，就算满座都唔觉迫，而且有一排窗外望街景，感觉开扬。调味料自助调配，另外饮品选择都好多，最体贴竟然有酸梅汤，蜂蜜柚子同菊花蜜，菊花蜜清甜润喉，唔会太甜，绝对真材实料。麻辣鸡煲一上枱就闻到香喷喷，配料绝不马虎，麻辣酱够晒惹味，鸡件嫩滑多汁，赞！呢度对食好有要求，食完鸡煲，就换个汤底锅先开始打边炉。而且有专人指导每款海鲜既烹煮时间，好细心。哗，真系未试过打边炉打到咁高级啰，竟然有原只龙虾海鲜拼盘。龙虾啖啖肉，鲜甜弹牙，龙虾头虾膏都好滋味。鲍鱼爽口弹牙。生蚝饱满唔缩水，够晒海水味。海虾大大只，又弹又甜。好简单既道理，因为够新鲜，材料靓，所以样样都好有水准。配料选择多，连海鲜都任叫任食，唔知系咪个海鲜汤底太正，普通渌个乌冬渌粒丸，都好味过人既。