花椒子 (已結業)

今晚去咗一间位于旺角嘅打边炉餐厅，装修非常之有特色，完全好似置身喺太空打边炉咁。首先我哋嗌咗个鸳鸯汤底，分别系花胶鸡汤同酸菜白肉汤底。绝无夸张，佢系半只鸡成个放落个汤底度，花胶亦都非常之弹牙，吸晒鸡汤嘅精华，好浓郁嘅汤底真系好滋味。另一边系酸菜白肉汤底，酸度啱啱好，亦都非常之多肉，好抵食。牛小排牛味非常之浓郁，亦都入口即溶，三色丸仲要系自己手打嘅，分别系墨鱼丸，猪肉梅菜丸同埋虾丸，睇得出呢间餐厅系有心思嘅。海鲜方面亦都非常之有惊喜，佢完全唔系雪藏海鲜，放落个花胶鸡汤度将个汤底升华咗， 呢度竟然系可以食到龙趸鱼片，鲍鱼，帆立贝广岛蚝，全部都系贵价食材。除此之外呢度嘅侍应生都好有礼貌，会为你定时定候加汤底，同埋呢度嘅服务水准一流，用心服务先会食得开心。最后我哋先落蔬菜，啲蔬菜吸收晒鸡同海鲜嘅精华，除咗鲜上加鲜之外，最后落埋个乌冬落去今餐真系非常之满足。