泰泰 (已結業)

我个人自问食尽香港船面，有日经过官塘见到居然见到有餐厅用船面做招牌，我点可以唔会一会佢。一入到去隐约听到厨房用泰文沟通，应该系泰国师傅，即管问吓佢地有咩好介绍，店员介绍如果中意泰国嘢又中意食辣就试吓 招牌船河 加冬阴功汤底（要加$10）。讲真我食过咁多地方，冬阴功汤底真系少见，惊你呀，试咪试啰。个船面一上台，卖相OK㖞！都好足料，大杂烩，猪、牛、鸡、扎肉、丸、猪红咩都有，可以一次过试晒所有配料。河粉居然系阔条嘅泰国河粉，呢个真系有诚意。到个重点冬阴功汤底，整体出嚟嘅效果正㖞！个汤底十分足料，有少少辣，辣得来又开胃过瘾。真系冇介绍错。特别系而家天气开始冻，暖一暖胃真系一流。冻0茶就泰式做法，泰国茶叶加青柠檬。可以一试。有机会下次一定会再嚟，试返佢个猪骨浓汤，咁就知系咪真系有料。