映水芙蓉 (海運大廈) (已結業)

同事话中意食呢间野，虽然我本身唔太食得辣，但少数服从多数，出得黎行预左要还，唯有跟大队啦。可能我地去得早，中午12点左右冇Book位都有得坐。入到去又几好Feel㖞，环境阔落仲有大块落地玻璃可以望下海景。可惜果日天气麻麻。好辣既同事好快就拣好左𩠌。敲糖棒棒鸡，一听个名就知系Gimmick野，上到黎又几搞笑，系D鸡上面用个糖衣整既野好似玻璃樽咁装住D麻油，之后用支匙羹系咁敲佢，敲碎左之后就捞晕佢，完。开头见到佢红当当既时候好惊佢会好辣，点知又唔会，反而麻油味香，D鸡肉都好嫩口，手撕鸡咁。同事另外嗌左个金牌毛血旺，今次见到佢红当当谂住佢会好似个鸡咁唔会好辣啦，点知中伏!!都几辣下，不过佢入面有好多唔同既配料。除左猪血，仲有荀、肥牛、鱿鱼仔、牛柏叶etc. 几种唔同配料食落口果种辣都有少少唔同，越食又越想食，都几过瘾。我觉得呢间野环境一流，野食既质素都唔错。