Orange Elephant Thai Restaurant (和富) (已結業)

呢一间位于北角和富中心地下嘅《Orange Elephant Thai Restaurant 》， 系朋友介绍， 位于港岛区嘅一间非常抵食嘅泰国餐厅。喺疫情难做嘅情况下， 呢间餐厅每日一蚊优惠价，救市大行动。 喺一至日都会推出咗唔同款式嘅一蚊特价菜。星期日就推出咗一蚊《黄咖哩鸡》。 呢一个咖哩鸡份量唔算少， 鸡片嫩滑无骨， 而且又有长青豆， 红辣椒等配菜， 黄咖哩汁只有bb辣，用嚟捞饭食相当唔错。另外《泰式海南鸡半只》，鸡味香， 而且鸡肉嫩滑， 就算系鸡胸部分亦唔鞋口。 点埋酸酸辣辣嘅泰式海南鸡酱， 非常之开胃。诚意推介《醉猫猪颈肉沙律》， 呢一个猪颈肉沙律相当惹味， 炭烤过嘅猪颈肉既肥美又爽口， 用上咗红葱头蒜蓉 青柠汁辣椒等配料来调味， 食起嚟集酸、辣、甜于一身， 相当开胃。用埋新鲜嘅沙律菜包裹住一齐食， 除咗更加健康之外，亦减轻咗油腻感觉。食泰国嘢又点少得泰象啤呢？ 呢一杯清啤清爽而唔苦， 最啱就系配搭一啲浓味嘅嘢食。至于唔饮酒嘅朋友亦可以叫个冻冰冰嘅椰青嚟饮， 既消暑， 又清甜解渴。呢一间泰国餐厅质素相当唔错， 而且价钱亦相当合理，推荐！