錵の工房 (已結業)

又一次系MEGABOX溜完冰，体力透支过后梗系食返个下午茶补返一下能量先啦。商场入面嘅餐廰都无咩咁吸引，就行返过地铁站𠮶边睇下有咩好食，行行下就发现呢间系工厂大厦入面嘅和式小馆。先黎系三文鱼沙津，鱼片都多同埋肥美。沙津虽然菜类唔多只有罗生菜及火箭菜，但用上花生/合桃及杏仁增加口感，味道提升不少。配上的伴食酱汁有红酒醋呢个就较甜及香口及橄榄油，可随喜好添加。手打和牛汉堡，超级厚身调味都够但干左少少。不过配上红椒汁一齐食可以弥补返湿润同时降低油腻感。而面包都松软唔会一压就偏晒，整体黎讲几唔错。跟餐有个罗宋汤，味道好浓同杰身。茄味同香茅西芹都够而且牛肉炆煮得好腍溶化晒入个汤度。绿茶鲜奶嘅绿茶味都够浓不过觉得遮左啲啲奶味就偏淡咗少少。饮落都滑身唔涩唔错。整体环境同食物都有日式家庭手作店嘅味道，食嘅时候又有几家大小同场感觉几温馨。