蝦立方休閒娛樂釣蝦場 (裝修中)

第一次寫食評好似寫旅遊介紹咁喺商業大廈開嘅釣蝦場的確係爽嘅，喺大熱天時，有充足嘅冷氣、有嘢飲、有嘢食又有得玩，個廁所都行幾步就到，就算一家大細、情侶、閨蜜、兄弟班都啱玩。佢一共有兩個池，每個池都夠十幾廿人一齊釣每人一支釣竿（有兩個鈎）同一個盤，個盤上面有個夾同蝦仔、毛巾。入場會有職員教你點樣將蝦仔上鈎同點樣釣。同埋見到其他人會帶私家竿嚟釣，不過都應該只限兩個鈎。開頭幾隻都會比佢走甩，但當掌握到個技巧就會陸續有收穫。同埋佢哋每個鐘都好似會加兩次蝦，所以入面係有足夠嘅餓蝦嘅。兩個鐘釣到十幾隻，都有斤幾重。釣完嘅蝦你可以選擇白灼或鹽燒，如果有一斤以上可以加$50做其他口味。今次揀咗佢哋推介嘅奶油味，佢哋會幫你剪曬啲鬚鬚腳腳。奶油好香又唔油膩，食到蝦嘅鮮味之餘亦滿咀奶油香，好食。佢哋都有供應其他小食比大家選擇。下次要同未玩過嘅人嚟玩，一來可以威吓，二來試埋佢其他口味。呢度以每小時收費，想玩幾耐就自己選擇。