荷華庭園景餐廳 (已結業)

今次同Daddy去咗喺大埔林村许愿树附近嘅荷华园景餐厅食lunch.入面环境好好，有小桥流水，桥下面又有锦鲤，餐枱旁边仲有喷水池，可以听住流水声用餐，成个用餐环境好舒适，不过可惜天气唔好，所以今次我哋唯有坐室内，室内嘅彩光都好好，而且好阔落。我哋每人叫咗一个set lunch，两个人都拣咗周打鱼忌廉汤，个汤好浓郁好足料，旁边仲配咗块好香嘅蒜蓉包。我爹哋叫咗一个美国安格斯肉眼扒(8oz) 都几好食，肉质好，而且话五成熟就真系做到啱啱好五成熟，出街食牛最怕就系叫五成熟，嚟到切开系八九成熟。我自己就叫咗一个串烧牛小排配薯角，啲牛小排好大旧，好香牛肉味同烧烤味，而且肉质、口感好松软，里面仲有肉汁一啲都唔会干，仲有个脆薯角，系我食过最脆薯角，咬落去每一啖都系有爽脆嘅声音。我哋仲叫咗一个蜜糖芥茉肉丸做小食，个蜜糖芥茉沟埋啲肉丸嘅肉汁好香好惹味。甜品系原味梳乎厘，好香蛋味，唔会太甜，非常之松软。整体嚟讲系非常之满意嘅，我最钟意食就系个牛小排同埋梳乎厘，而且呢度环境非常之好，好适合过嚟拍拖，又或者几个朋友舒舒服服咁倾吓偈，我爹哋食到一半已经话嚟紧亲戚聚会Book呢度，试吓佢哋个晚餐。