紅番茄餐廳 (已結業)

本身今日谂住同朋友放工后去食晚饭Happy Friday，大家都想去间环境唔错既cafe 到ladies talk，点知因为无订台既关系，唯有下次再去过，晚饭时间周街都难揾野食，记得呢头好似有间红蕃茄餐厅，即时上开饭网揾揾，原来就系附近，一向钟意食蕃茄既我，梗系即时提议去啦！我地每人叫左一个餐，包餐汤，蒜茸包，主菜同埋餐饮。餐汤叫左一个红汤一个白汤，红汤系蕃茄汤。蕃茄汤卖相麻麻，但系饮落好好味， 酸酸微微，蕃茄味够浓，可惜唔够热，有改进空间。蒜茸包方面好脆，蒜茸味适中，唔错。香甜海鲜意粉配香草蕃茄汁:每一条意粉都沾上蕃茄汁，每食一啖都食到香草蕃茄味，加埋各式各样既海鲜，有带子有虾有青口有蚬，真系提出海鲜既鲜味，食落真系几开胃。红蕃茄德国咸猪手配黑椒汁:黑椒咸猪手采用酥炸方式炮制，猪手既皮炸得好松脆， 内里既肉又好有咬口，亦都好鲜嫩，颜色呈嫩红，配上香浓黑椒汁同薯菜，非常惹味，不过，个人认为，唔洗点黑椒汁已经好好味啦。最后饮返杯热辣辣味道又香浓既咖啡，非常满足。