阿純山東餃子

营业中

休息中

边个话米之莲餐厅一定系贵㗎，今次等我M佬带A姐去试下位于太子嘅阿纯山东饺子，系我最爱嘅平民米之莲餐厅。阿纯山东饺子装修一啲都唔靓仔，类似茶餐厅嘅setting，四围贴咗好多食物相。如果多人嘅时候，真系会好迫。好似今次早去有卡位坐。一坐底，就有伙计送上清茶嚟，唔讲唔知原来𠮶杯清茶系山东名产磱山绿茶，不过饮落去无咩味，好似饮水咁。既然间餐厅叫做阿纯山东饺子，招牌菜就梗系饺子啦。呢到嘅饺子系每日新鲜包，晏啲嘅话，某几款饺子会可能卖晒。我哋今日叫咗香芹鲜肉饺同西洋菜鲜肉饺。望落去两只饺𠮶样差唔多，好难分，但一食落口就好唔同。A姐食到哗哗声，话好香芹菜同西洋菜味，又好多汁。不过我觉得𠮶皮无以前咁薄，但系都好好味。钟意食香口嘢嘅朋友，可以加五蚊食煎饺。除咗饺子，呢到嘅其他嘢都好正，其中我每次都会叫芥末黑木耳，少少黑醋加少少芥末，okay醒胃。加上黑木耳有可降低胆固醇，控制血糖，帮助排便，提升免疫力。钟意饮酸辣汤嘅朋友一定要试阿纯嘅酸辣汤。呢到嘅酸辣度啱啱好，又够足料。不过A姐觉得好似辣得滞。另外，我哋仲叫咗𠮶招牌阿纯炒饭，其实同杨州炒饭差唔多，有蛋，有葱，有虾同鸡肉，不过炒得唔够干身，唔建议大家试