麵屋一平安 (已結業)

平日黎，好彩地一入去就有位，虽然只系坐吧枱，不过两个人都方便倾偈，仲好。由于心情麻麻，一心谂住丧食，所以除左必食既拉面仲吞拿鱼蓉配紫菜之外，仲点左好多平日唔会点既食物。先讲拉面，因为只系两个人，所以叫一碗特制什锦猪骨汤拉面就算，拉面都OK既，够香，唔会稔滋滋，但个汤底就淡左D，系好足料，极唔晒。吞拿鱼蓉配紫菜：吞拿鱼蓉入口即融，加埋WASABI同紫菜食，一流，保持水准，超想ENCORE。一平安沙律：第一次叫，贪佢清新够醒胃，结果都冇令人失望。西京烧银雪鱼：比想像仲细，见佢成$78，以为会有一大块，点知两旧加埋细个部IPHONE。味道偏甜，但鱼肉够滑，加分。特饮既石榴梳打同桃梳打加返分，因为颜色粉粉地几靓，仲好好饮。串烧盛合：呢个系外加既。见佢MENU影到鬼咁靓，咪叫黎试下。点知：等得耐，叫左半个钟，催过几次先有，而且黎到，D串烧好似烧干晒咁偏，味道仲超咸！仲系款款都咁咸！搞到成晚好口渴，唔会再叫。基本上都ok既，一定会再黎，但唔会叫串烧。