影片
更多
2014-03-12
216 浏览
「都市闲情」唔喺想讲电视台一个午间妇女节目，想话晌市区里面，一样可以揾到处叫人感到闲情逸致嘅餐厅，晌边？咪就喺香港公园内嘅L16泰式餐厅。多谢食友邀请，让小弟可以掹车边嚟到L16，跟一大班食友谈天畅聚，气氛开怀。原来L16已开业多年，仲晌2012年从新装修，无论户内、户外，都一派泰式风情，周围树影婆娑，餐厅后仲有瀑布小湖，环境非常清幽。附近嘅上班族嚟食晏，始终要睇时间，点都会来去匆匆，但星期六、日嚟食个漫活午餐，心情轻省，绝对唔会忐忐忑忑、十五十六。踏入室内，两只以泰菜名串连而成嘅小象、大象图案，得意别致，咁你就知L16主打泰国菜，但亦附设日本菜及中菜，适合多心嘅客人。今午主要都喺品尝泰菜，但听正正晌附近返工嘅食友讲，原来佢哋嘅日菜亦都不俗。仲怕佢做得唔专一，水准飘忽，但难得几边都兼顾到。依日晏昼有少少回暖，赶到嚟有啲热，所以，未食先饮。因为L16都兼营酒吧，所以，酒水牌内嘅饮品选择非常之多，由餐酒、白兰地、威士忌、啤油、鸡尾酒、泰式饮品……以至果汁、汽水、特饮……等等，一应俱全。芒果特饮 $55有啲似印度嘅芒果酸奶（Mango Lassi），但仲要杰身啲，而且冰感又无咁重，几好饮，因
原来L16已开业多年，仲晌2012年从新装修，无论户内、户外，都一派泰式风情，周围树影婆娑，餐厅后仲有瀑布小湖，环境非常清幽。附近嘅上班族嚟食晏，始终要睇时间，点都会来去匆匆，但星期六、日嚟食个漫活午餐，心情轻省，绝对唔会忐忐忑忑、十五十六。
踏入室内，两只以泰菜名串连而成嘅小象、大象图案，得意别致，咁你就知L16主打泰国菜，但亦附设日本菜及中菜，适合多心嘅客人。今午主要都喺品尝泰菜，但听正正晌附近返工嘅食友讲，原来佢哋嘅日菜亦都不俗。仲怕佢做得唔专一，水准飘忽，但难得几边都兼顾到。
依日晏昼有少少回暖，赶到嚟有啲热，所以，未食先饮。因为L16都兼营酒吧，所以，酒水牌内嘅饮品选择非常之多，由餐酒、白兰地、威士忌、啤油、鸡尾酒、泰式饮品……以至果汁、汽水、特饮……等等，一应俱全。
芒果特饮 $55有啲似印度嘅芒果酸奶（Mango Lassi），但仲要杰身啲，而且冰感又无咁重，几好饮，因为芒果味天然，浓郁到不得了。
至于印刷精美，部份菜式图文并茂嘅主餐牌，认真包罗万有，餐前小食、沙律、汤类、鸡牛猪、咖喱、正宗泰式美食、海鲜、蔬菜、素菜、粉面饭及甜品，仲有多款招牌香辣菜，不拘泰式，更有多款喺中式添。
沙田柚沙律 $88好多时泰国餐厅嘅柚子沙律都采用泰国金柚，估唔到今次L16嘅改以沙田柚入馔，味道一样唔错，柚肉大大件，又有爆汁效果，再加埋少少花生粒、炸虾干点缀，酸酸甜甜，开胃清爽。题外话，泰式沙律本身都好有个性及特色，所以，店内沙律有成10款供应。
田园锅粑 $72锅粑裁成小件，方便添加酱汁一起食用。小碗内喺椰酱鸡肉，鸡肉刴得细碎，酱汁带甜，好重椰汁香，质感浓厚，而锅粑入口非常松脆，两者加起嚟，确实不俗。
炸虾饼 $72、泰式炸春卷 $52、泰式烧猪颈肉 $82餐前小食类有廿多款，最简单自不然喺叫L16拼盘（$208），一客有齐多款小食。不过，店方已安排好3款小食俾我哋品尝，仲以拼盘形式送上，包括炸虾饼、泰式炸春卷、泰式烧猪颈肉。以虾饼及猪颈肉较较出啲，前者虾味浓而弹牙，后者带点爽脆；春卷唔喺话好差，只喺唔起眼，食完都留唔低咩印象。此外，仲有三色酱汁跟餐前小食同上，估唔到泥黄色嘅辣椒鱼露挺辣吓。
绿咖喱鸡肉配薄饼 $86咖喱类有红、黄、绿，均可配牛肉、鸡肉、猪肉、牛腩周羊肉，不过，薄饼或蒜蓉包则要另外单点。绿咖喱辣度属于温和，又带少少柠檬酸香，配鸡肉唔错，只喺酱汁质感较为单薄。
蒜茸胡椒肉 $76列晌「正宗泰式美食」一栏，睇样唔觉乜嘢，入口有一阵阵火辣，好重嘅胡椒辣劲，反而蒜味被遮掩晒，再者，似喺一道炒肉片，惹味确喺惹味嘅，但始终都略嫌欠缺亮点。
泰式烧羊扒 $138今回最喜爱嘅菜式，因为唔单止烧得膻香，一上枱已香气四溢，而且肉嫰多汁，入口肉质软腍，好有水准嘅碳烧菜式。
水煮鱼 $238上文都提过，店内有提供多款中式招牌香辣菜，如宫保炒羊肉、口水鸡、天府虾仁……等等，当然唔少得依款水煮鱼啦。虽然晌泰式餐厅食川菜，有点怪怪嘅感觉，但睇起嚟卖相几对办，鱼片食落都挺滑溜，不过，辣度绝对好温和，有啲失去应有嘅神髓，嗜辣嘅人应该几失望，但怕辣又想试吓「水煮」菜式嘅人，就可以放心一试。
金蒜香茅地狱蟹 $388单睇菜名已好有霸气，未试都知佢喺一道重口味嘅菜式。以金蒜、香茅、辣椒爆炒肉蟹，蟹肉嘅鲜味又嚟得带些多层次嘅香料味，鲜味与惹味都平衡到。虽然称之为「地狱」，不过无想像咁辣，顶多都喺两、三层地狱而已。
干炒贵刁 $82其实今日菜式之丰富，读到依到你都知，不过，或者店方都怕我哋唔够饱，试菜名单中预备咗一道粉面饭「干炒贵刁」。因为喺干炒关系，所以唔见一般炒贵刁咁下蛋浆，贵刁内亦只有些少豆腐干，碟边伴有半个青柠、辣椒粉等，食前要先将各配料跟贵刁捞匀，可能贵刁有啲干身，个人觉得一般啫。
餐饭去到尾声，甜品总唔少得，再翻翻餐牌，甜品选择原来甚多，兼且有啲特色雪糕！
椰汁香芒糯米饭 $66经典嘅泰式甜品，椰汁喺以小碗另上，而糯米饭用上白糯米及紫糯米沟黑糯米两烛，由于小弟都好钟意食糯米，无论黑白紫，加上浓浓椰奶香，饭粒又烟糯，已觉得好好食，唯一可惜少少喺芒果唔够香甜。
南瓜蛋 $46卖相有趣嘅南瓜蛋，喺一个南瓜加炖蛋嘅甜品组合，不过，南瓜食落未腍透，尤其近边位，仲有少少生硬，而炖蛋部份如换上鸡蛋布甸，感觉更良好，因为依家炖蛋入口唔软滑，有啲老嘅感觉。
椰汁西米糕 $46、千层糕 $46虽然之前两道甜品稍有所欠，不过，是日打孖一齐上嘅最后两款甜品，却无令人失望。椰汁西米糕，椰浆下嘅西米糕，加入马碲粒，清爽富口感，而千层糕质感烟韧，一层椰汁一层班兰，清香又唔过甜。
如果嫌散叫烦，餐厅都有提供套餐，由二人、三人……到八人套餐共5款，加埋一，围起上嚟每人都唔过$200，喺比较划算嘅选择。
若然唔晌附近返工，拣个星期六、日过嚟，享受吓户外阳光，感受吓春日和风，食个午饭，一样喺唔错嘅决定。
当你以为L16只不过喺间一般泰国餐厅，其实，佢哋仲有做婚宴、生日派对、公司大型活动……等等。晌咁轻松嘅环境庆祝、进餐，食物嘅味道都可能唔同啲，因为，心情好都喺一种调味剂。
张贴
