龍皇酒家 (Mikiki) (已結業)

由于今日系表姐细仔百日宴嘅大日子，所以大姨妈就拣咗喺新蒲岗Mikiki商场嘅「龙皇酒家」摆百日宴！喺预订嘅时候店员向大姨妈推介咗呢个今期做紧$2888超优惠嘅「龙皇」乳猪龙虾海参宴，睇落好似几抵食，所以我们就拣咗呢个套餐！烫手妙龄猪烧得外皮好香脆，肉质好松化软滑，而且肥瘦均匀，无乜太多嘅脂肪，所以唔会有好油腻嘅感觉！红烧花胶海参翅嘅浓稠度调教得恰到好处，唔会过稠或过稀，而且材料嘅份量都几足料！葱油加拿大龙虾乌冬嘅肉质都几爽甜弹牙，乌冬嘅质感亦好烟韧弹牙，芡汁再加埋香葱，令到味道更加惹味！大龙趸两食：翠玉炒球嘅肉质好结实弹牙，每件都几大件厚身，啖啖肉咁，真系几正！神草蒸头腩蒸得啱啱好，所以肉质相当鲜甜嫩滑！避风塘软壳蟹虽然好够镬气同埋都几惹味，但美中不足嘅系份量就比较少！豉油皇脆皮鸡嘅皮烧得都几卜卜脆，肉质亦几松软嫩滑！鲜百合野菌泡时蔬有多款杂菌、清甜嘅百合同爽脆嘅时蔬，所以浸泡著嘅汤底味道相当清甜！五谷丰登系用榄菜嚟炒饭，但油嘅份量比较多，而且炒得唔算好干身，所以感觉比较油腻！精美甜品系椰汁桂花糕，但椰汁嘅味道过度香甜浓郁，掩盖晒桂花糕嘅味道，所以完全食唔到桂花糕嘅清香味！