富東閣海鮮酒家

营业中

休息中

今次我哋嚟咗呢间屋邨酒楼，印象中好似十几年前嚟过，希望呢啲小本经营酒楼可以挨过呢个疫情，原本谂住叫set，但系佢冬瓜盅同埋鲍鱼都卖晒所以我哋就散叫咗啲小炒。第一样嚟嘅就系咕噜肉，不过不失，啲咕噜肉系长条型，我就比较钟意食一嚿嚿𠮶啲，同埋佢唔系好热，我估佢系整定一大堆for冰镇咕噜肉(贵d)。之后个炒通菜就热辣辣，份量都好足够，足4至5个人，唔会话好油，啲菜又唔会好老。之后就系有粟米羹，饮完一碗都饱饱地，系足料嘅，又大煲，啲姐姐仲好好人帮我哋分埋。呢条椒盐鲜鱿性价比真系最高，新鲜炸出嚟，好有咬口，分量超足，以前同朋友食都唔够分，而家每人可以食4,5旧，如果有得加埋咸蛋黄就好啦。最后就系呢个美极炒虾，细心发现酒楼好好，剪晒啲虾须虾脚，用口剥壳食𠮶阵就唔会吉亲，超入味，佢仲可以拣椒盐炒虾，下次可以试吓，啲虾食落去好弹牙，唔会梅，每只都好想啜光佢d汁，小心食到成身都系。最后温馨提示返各位揸车嘅朋友，商场系冇泊车优惠的，自己执生。