十三少 (已結業)

首先，我必须一赞，呢度嘅员工大部份都系后生仔，而且服务态度非常良好。嚟呢度，其实一般而言，我都系食酸菜鱼同埋麻婆豆腐，因为四川菜来讲嘅话，呢两款菜，都算系几标志性。而又咁啱，我可以叫二人套餐，来满足我呢两个愿望。二人套餐系$338 ，价钱上来讲，唔会话好平，我觉得价位算系中上，但虽然话系二人套餐，但我觉得绝对系四个人食都足够嘅份量。前菜系一碟酸辣嘅土豆丝，细细碟，用来做开胃菜嘅话，麻油味几重，都可以开到胃。之后就系呢碟麻婆豆腐，麻婆豆腐上面有唔同嘅香料，包括胡椒粉、黑椒粉、麻油。所以调制得非常香，加上豆腐好硬身，麻婆豆腐酱完全渗入晒喺里面，有好香嘅麻辣味，攞嚟送饭嘅话非常一流。到最后就系呢一碟酸菜鱼，非常之大，我特别好欣赏佢呢度嘅鱼肉，片得非常簿身，咁样可以令到汤汁充分融入晒喺里面；听到嘅店员亦都特别提醒我，饮汤都系其中一个重要嘅环节。汤味酸中带香，微辣，亦都有少少嘅清甜味，总括而言我对呢餐感到非常满意。