California Pizza Kitchen (已結業)

捉完急冻鸟要揾嘢食医肚，就两条友走咗上 Megabox 揾嘢食。行过见到呢间铺头有 set dinner，食物选择都算唔错，就决定入去试吓啦。二人套餐系可以选择一样前菜、一款意粉同埋一款薄饼，于是我哋就叫咗牛油果蛋卷、香辣海鲜意粉同埋辣肉肠薄饼。由于入去嘅时间都算早，有客嘅枱唔算太多，所以啲嘢食都好快就嚟到喇。牛油果蛋卷入面嘅牛油果唔算多，反而有好多肉类嘅填充物，而且上菜嘅时候油味都几重下。作为前菜嚟讲佢嘅份量都唔算细，每人两件都几饱吓。两种酱料配搭起嚟味道效果相差唔大。至于香辣海鲜意粉，其实除咗虾之外，都混杂左唔少嘅肉类；香草味同辣味算系基本，就算唔食得辣都唔会有好大问题。薄饼都系少辣，饼边算脆，但靠中间地方焗得唔够干，有少少似包嘅感觉多啲。虽然两道主食主打香辣，但食落去其实咸味比较重，甚至可以话几重口味。好在餐饮嘅柠茶同汽水系无限添饮。以二人餐份量嚟讲，其实都几多下，我地两位年青男士都食唔晒，如果追求份量，呢间铺都几抵帮衬；八点食完，饱到半夜都仲有感觉。员工服务态度几好，好快会帮你清走啲盘（份量大，啲盘都好大，都几阻掟），而且员工见到嘢饮见底会主动问你要唔要添饮。