冠華粥麵

营业中

休息中

以前系石围角读书时，lunch 会黎食碗牛杂米，又平又够饱，最重要系好味，冇谂过隔左十几年间舖仲系度，装修依旧，老板仲系那个四眼叔叔。当然价钱比起十年前加左唔少，但我都深明通涨嘅影响。今次黎到叫左碗牛筋米粉，碗面一上，依旧系好香嘅牛味但又唔会太稣，一见到碗面回忆返哂黎，先饮一饮啖汤底，同十年前一样，都系用牛慢慢煮出黎嘅汤底，但个米粉就唔再系以前白雪雪比较硬身嘅米粉，变为较为半透明软身少少系屋企会煮嘅米粉。牛筋大约有5旧，软硬适中嘅牛筋十分入味，每啖都有好香嘅腩汁味，再加入佢地自家嘅辣椒油！正！佢地嘅辣椒油系十分辣，我通常落一匙就已经够，除左够辣仲够香，唔会系一味得阵辣味。呢间店舖已经成为好多人嘅回忆亦都系好多中年男士嘅聚脚点，眼见佢地会大家各坐一台，叫左2-3支啤酒食住牛杂睇住电视吹下水或睇下跑马，开开心心咁就过一日，呢种咁有情怀嘅小店，依家卖少见少我地应该要更加珍惜。