時新快餐店 (已結業)

细细个住呢头都成日喺度买汉堡包做早餐，味道当然唔记得晒，只系知成日去，𠮶时佢都冇而家咁红；分别经年，佢已经系开饭嘅超赞当红食店，今日特登再一次重温儿时曾经日日食嘅汉堡包。红店果然多慕名而来嘅食客，我哋排咗一阵先可以入到去，叫完佢系即刻做嘅，所以先揾位坐低，听号码再攞嘢食。店入面冇乜点大整过，系佢啲胶袋印晒字，仲有啲员工有制服著咁啰，终于食得嘞，我哋叫咗： 双层芝士蛋汉堡包：山长水远嚟到，当然试佢最贵最多料嘅包款啦，佢嘅包有烘过，少少外脆内软；牛肉有两层，入面有啲洋葱粒增加香味同食味，牛肉味唔系太浓但肉汁丰富；中间块煎蛋啱啱煎到剩番个蛋黄有少少未熟，食落好嫩，仲可以湿吓块牛肉，等佢再多啲汁；最底层嘅芝士因为热到半融，亦加添美味，的确系比麦记出色好多！ 热狗：普通咗啲，沙律汁唔够杰身搞到个包好湿，肠仔亦系来货，一般处理手法冇乜过人之处。 冻鸳鸯：够香够浓，面头仲有啲似意式咖啡嘅泡沫，几好饮！可能系期望过高，唔系觉得特别好味，因为好多快餐店啲汉堡包都差唔多系咁嘅味，可能咁啱红磡呢个位得佢一间，所以先创造到佢嘅传奇！