鉄人旨花

营业中

休息中

想试呢间鉄人旨花好耐，life门一打开就见到用咗好多花做布置。呢晚我哋食omakase，于是就坐晌寿司台度。除咗omakase，佢哋仲有铁板烧架。先嚟嘅系前菜，卖相唔错。刺身系原只龙虾，师傅即席生㓥起肉。虽然已经被切成刺身，但细心一睇龙虾对眼同啲脚系仲郁嘅，生猛之余又有少少残忍。铁板单品系和牛薄烧，肉质软嫩，配埋香草酱就仲惹味。一边食一边欣赏师傅用心炮制刺身同寿司，都几赏心悦目。帆立贝寿司，顶层嘅柚子酱几清新。深海池鱼寿司，食起上嚟有鱼香。金目鲷寿司，表面经轻轻火炙过，几爽滑。拖罗寿司，入口咬几咬就即化。海胆寿司，味浓甘甜。花穴子寿司，外层嘅烧鳗鱼有焦香同松化。烤物系喜知次，鱼肉细嫩，仲可以唧少少柠檬汁提味。龙虾清汤系用啱啱刺身嘅龙虾头同龙虾脚煮成，饮起嚟都几清同舒服。呢晚嘅甜品系春樱杏仁豆腐，上面嘅系樱花蓉同樱花渍，杏仁豆腐滑溜，味道几得意。