焱丸水產 (已結業)

同朋友去咗呢间焱丸水产食晚餐.餐牌每页都系图文并荗,好多嘢都想叫,最后只系试咗几样.蟹籽蟹肉薯仔沙律用咗生菜托底,个外型好似朵花咁,爽脆嘅蟹籽下面系一丝丝蟹肉,最底层嘅薯仔加咗沙律酱,质感近乎薯蓉咁几滑溜.什锦天妇罗入面有海老,白身鱼,南瓜,番薯,茄子,冬菇,青椒仔,海苔.海老有三件,青椒仔有两件,其他款式都各一件,炸浆薄脆香口,冇过多油份,啲蔬菜仲留有汁液,唔错.芝士什锦海鲜盛即系铺满芝士嘅日式薄饼,上面仲有八爪鱼,车厘茄同埋爽口嘅蔬菜丝.同意大利薄饼有少少分别,批底薄身,质感偏湿润唔脆,有少少似御好烧𠮶种粉浆煎饼,不过我冇求证,只系自己食完之后觉得质感近似.海胆帆立壳烧,三文鱼籽帆立壳烧.两款帆立贝都好肥大厚身,烧𠮶阵仲加埋清酒同烧汁等,汁甜有牛油香.三文鱼籽帆立壳烧入面啲三文鱼籽烧完后咬起嚟弹牙,同生食嘅口感极之唔同,金菇,豆苗同青椒仔等仲吸满汤汁精华.海胆帆立壳烧就多咗份海胆嘅甘甜鲜香,当中嘅蔬菜如鸿喜菇等亦同样惹味.再试埋梅干梳打烧酎,成杯呈渐变粉红色,捣碎咗嘅梅干睇起上嚟仲有啲似樱花渍,咸酸中带微微酒香,几易入口.