Barg (已結業)

星期六晏昼去咗耀华街百乐中心揾嘢食，见呢间西餐厅啲comment唔错就试吓。坐低点咗嘢食一阵，店员就送上餐包，餐包热辣辣，外脆内软，搽上香草牛油食，几好味。龙虾汤海鲜意大利饭$218一上枱香气扑鼻，材料丰富，有一只大虎虾、两只蓝青口、两只托托蚬、虾仁同埋鱿鱼圈。海鲜新鲜，虎虾爽口弹牙；蓝青口鲜甜美味；托托蚬肥大肉厚，鲜味冇沙。意大利饭软硬适中，最紧要系酱汁超好味，龙虾汤好香，加入一啲蒜片同埋香草煮成嘅risotto好香浓好正。意式辣肉肠薄饼$138呢个薄饼底系薄身脆脆的𠮶一种，香口酥脆嘅薄饼底铺满咸香嘅芝士同埋辣肉肠，好香口惹味，食完都唔会觉得好油腻。朱古力心太软$98呢个甜品极度邪恶，热辣辣嘅朱古力brownie焗得微微脆边，一个匙羹笃落去绵绵湿润嘅香浓朱古力酱涌出嚟，𠮶只朱古力唔会太甜，食嘅时候加入云呢拿雪糕，一热一冷嘅口感好好。