蟹慶 (已結業)

铜锣湾有好多好食嘢，但最近揾到间隐世小店几值得推介。呢间餐厅系食蟹嘅专门店，点入面有好多蟹嘅饰物。我同朋友试咗蟹愉套餐，可以一次过试几款唔同嘅虾蟹煮法。首先系大虾沙律，加咗蟹籽同柚子醋，开胃又健康。跟住系季节刺身三点，有带子、三文鱼同池鱼，厚切肥美，真系唔错。松叶蟹肉三文鱼籽茶碗蒸，蒸蛋滑溜好食，仲有茶碗蒸必备嘅冬菇同白果。盐焗活蟹，原只上碟，剥壳食嘅时候，蟹肉有时会沾到粗盐带，令蟹肉增添少少咸味，有调味效果。龙虾天妇罗，非常惊喜，有大大只嘅龙虾，又弹牙又好肉地，仲有秋葵、南瓜同甜薯，点酱油或者粗盐都好好味。鲷鱼白汤都几香浓，鲷鱼鲜味突出，仲有豆腐同松茸。松叶蟹肉浓汤素面，素面口感偏软，可以捞埋质地较穊嘅浓汤一齐食，令蟹嘅鲜味更加突出。最后系甜品，红豆绿茶布甸配黑糖蕨饼，甜得嚟唔会盖过咗头先蟹宴嘅味道，为套餐划上完美嘅句号。