鳥森 (已結業)

我今日去左铜锣湾，去到一间朋友赞过嘅楼上鸡串烧餐厅，果然冇介绍错！我同朋友各自叫咗鸟森串烧五本同精选串烧六本。串烧就share食，所以试到好多唔同口味。每份餐都有附送鸡出汁、茶碗蒸、渍物、沙律、御饭同热饮，而我同朋友就拣咗咖啡。渍物酸酸地，开胃又爽口。蕃茄沙律上面有蒜蓉，辣辣地好惹味。茶碗蒸嘅蛋好滑，入面仲又有鸡肉。御饭有蛋黄同紫菜，风味独特，捞埋食份外滋味。咖啡有炭烧味，调味用嘅奶滑得嚟唔会腻。鸡出汁闻到好浓沃嘅鸡香。串烧方面，茄子多汁，上面有明太子调味。牛横隔肌好软熟，但又有咬口，口感平衡得好好。免治鸡肉棒，好好肉地，外面烧到焦香但唔油腻。紫苏里芋豚肉卷，上面搽咗甜甜酸酸嘅梅酱，一层豚肉喺外面包住好脆口。黑豚猪腩串，油脂丰富，外层烧到有啲酥皮嘅质感。鸡胸软骨，平时好少见烧软骨，保留到香脆但冇炸鸡软骨咁邪恶。冬菇好juicy。鸡腿肉同鸡翼，啖啖肉，连埋鸡皮烧更加香口。整体黎讲，呢间餐厅食物质素好高，串烧亦都几有特色，绝对系铜锣湾闹市嘅hidden gem。