古月

营业中

休息中

之前都有提过北角呢条巷仔有好多唔同嘅食店，有新开嘅，都有开咗好耐，不过越嚟越开得多，所以呢条街就越来越旺，上次试完青藏牛肉面，今次就试吓呢一间古月。其实今日去食嘢𠮶阵时候个肚仔有啲唔系好舒服，都唔知食啲乜野好，就想食啲青青地嘅粉面，见到佢有一个招牌嘅肉骨茶可以配米粉，所以就拣咗呢一个。肉骨茶同埋米粉系分开上嘅，呢种肉骨茶系属于清淡嘅类型，而唔系好浓味𠮶只，一碗大概有4旧肉，有半肥瘦亦都有骨嘅部位。另外佢嘅特点就系有一旧好大嘅蒜头，初头谂唔到点食，估唔到咬落去啲蒜头肉就烧左出嚟，好得意，食落去一啖蒜头一啖米粉咁样，个感觉都几好。再讲一讲个汤嘅味道啦，个汤嘅味道有肉味，同埋浓胡椒味，饮落去有少少辣辣地，但系𠮶种辣唔系刺激嘅感觉，而系有啲暖胃感，整个感觉都好舒服。另外佢个餐仲可以加两蚊配一杯热饮，我就选左个马来西亚拉茶，呢个拉茶好有马来西亚嘅风味，而且呢度仲可以拣斑斓味道。虽然饮落去就唔太觉得有斑斓味，斑斓应该就系粉状，加左喺奶茶上面，所以一入口就有少少甜甜地嘅感觉。呢度嘅嘢食几好，款又多，而且系特别。另外仲见到有一啲马来西亚嘅辣拌面，鸡饭，可惜我今日就试唔到，下次一定要再过嚟试吓先。