元札幌拉麵 (悅來坊)

营业中

休息中

今日去咗荃湾悦来坊本身谂住去超级市场买啲嘢食，经过见到呢间日本拉面即刻点燃左我对日本拉面嘅心瘾😍😍 即刻冲左入去试吓，果然冇令我失望！一睇餐牌佢拉面嘅选择都几多，搞到有选择困难症嘅我都有啲头痕，最后店员就推荐左我豚软骨拉面，我个朋友仔就钟意食辣所以叫咗地狱拉面。而个汤底大家都可以拣嘅，分别有猪骨味增同埋酱油汤底。我哋就拣咗猪骨汤底。除咗汤底之外仲可以俾你拣埋面嘅硬度，我地就两碗都叫咗硬面。好多唔专业嘅拉面店，师傅可能技巧唔纯熟，你叫硬面有时佢可能会搞到个面过生，依间就处理得好好，面嘅硬度十分弹牙，值得加分。猪骨汤底都好浓郁，我估就有可能系自己用猪骨煲嘅。另外值得点名一赞嘅就系佢个猪软骨，酱汁超级入味，而且肉质入口即化，个软骨亦都唔会煮得过冧，啱啱好😍 所以建议大家嚟到都试吓猪软骨拉面。我个朋友碗地狱拉面虽然就冇想像中咁地狱🤣但系佢个辣味都几好食，钟意食辣嘅朋友仔可以试吓。另外佢仲有好多唔同嘅小食都几吸引，不过我哋就比较细食所以就冇试到😭 总括嚟讲呢间都算系隐世嘅高质拉面店，推荐大家一试！