鐵堂 (已結業)

仲有唔够两个星期就过年，趁今日假期，唔使返工，专登过嚟佐敦办年货。行街前先医饱个肚仔，喺白加士街见到有间日本餐厅，睇咗门口嘅餐牌，原来晏昼有套餐供应，价钱好经济，加上新开张，第二位仲有半价优惠，一于试下。我哋每人点咗一个午餐，套餐以「金、银、铜、铁」命名，非常特别。《银》套餐有枝豆、唐扬炸鸡、蟹肉可乐饼、牛肉寿喜烧同紫菜饭。枝豆很爽口，豆味浓郁，食得出好新鲜。唐扬炸鸡即点即炸，咬下Juicy 有肉汁；而可乐饼味道亦唔错，外层松软，馅料香滑，入口 Creamy 味美。寿喜烧用料亦绝不欺场，汤底甜甜地，入面有劲多肥牛、金菇、冬菇、杂菜、红萝卜同标志性嘅生鸡蛋，用嚟配紫菜饭食，饱肚又满足。至于另一客《铁》套餐就包括有面豉汤、味付螺肉、唐扬炸鸡、葱烧牛小排同月见饭。面豉汤味道啱啱好，入口浓淡得宜。螺肉弹牙带嚼劲，而唐扬炸鸡亦热辣香脆。另外牛小排都好正，脂香同肉香都非常丰富，入口啖啖滋味。月见饭水准亦一流，饭粒烟韧饱满，与日本生蛋黄拌匀，每啖都充满浓香蛋味。