Fifty Fifty (已結業)

今日約咗個舊同學去長沙灣嗰頭食飯，大家行嚟行去，行咗一陣唔係太諗到食乜好，因為附近都幾多選擇，最後見到一間西餐店叫Fifty Fifty，就行咗入去。呢度幾貼近潮流，餐牌用上Paperless menu (無紙餐牌），要自己scan QR code，慳返幾張紙幾好！首先餐湯係南瓜湯，餐廳專登砌咗個50 50同笑哈哈嘅圖案，幾得意。今日胃口唔錯，我嗌咗份澳洲肉眼扒拼大蝦，仲有少量薯蓉同沙律菜伴碟。肉眼扒非常juicy，肉汁滿溢，牛味亦非常豐富。我老友嗌咗個香煎大虎蝦蝦頭油闊蛋麵，賣相都唔錯，師傅製作有水準，落咗唔少香料。我偷偷試咗幾條，闊蛋麵嘅口感幾特別，搭配呢個醬汁好夾，朋友評價亦唔錯！每人嗌一杯嘢飲，我嗌咗水果柚子蜜，估唔到佢係用呢隻壺嚟上，即刻令成個享受加咗分！朋友叫咗一杯青檸梳打，佢點評話幾好飲，唔會太甜！由於我哋係嗌套餐，每人有一個甜品，今日係送朱古力奶凍。平時好少機會食奶凍，口感又幾特別喎！