興樂菜館

营业中

休息中

黎到长洲梗系要食海鲜，码头出咗转左直行，有一排海鲜档，好多人会攞住个餐牌拉客。如果唔想食太贵，又唔追求好高质嘅海鲜，兴乐菜馆都系一个唔错嘅选择。我哋就嗌左六款小菜套餐 ($388)，喺餐牌任叫六样嘢都唔过$400，相比其他餐厅算抵。白灼东风螺，份量都几多，味道就一般，都系钟意炒嘅会再惹味啲。椒盐赖尿虾，椒盐味都几重炒得几香，不过呢个价钱就唔好预佢系好大只啦，但系拆开左都有肉食嘅。姜葱炒蟹，蟹就应该系用水蟹唔系啲好多肉嘅，不过姜葱都爆得几香，过吓口瘾都唔错。蒜蓉蒸蛏子，呢个有惊喜，份量多，蛏子嘅肉都几饱满，食到有鲜味，呢个几推荐。蒜蓉粉丝蒸扇贝，呢个就明显系用啲比较细只既扇贝，其实就冇乜肉食嘅，但系粉丝同蒜蓉调味都唔错。虽然全部嗌海鲜会抵食啲，但都想食个菜，就嗌咗清炒菜心。呢啲菜炒得够香够油，食落几好食。总括我觉得呢间菜馆嘅海鲜一定唔系好高质素，但系调味方面系唔错嘅，加上价钱咁平，算系抵食嘅。以呢个价钱食到呢个份量嘅海鲜，啱晒黎到长洲想平平哋过下海鲜瘾。