蘇波記川湘粵菜館

营业中

休息中

终于挨过一星期，又到放假嘅日子。今日元宵佳节适逢港铁有半价优惠，于是同女朋友计划去咗长洲行吓。我哋迟起身，未食早餐；一落船先队左个芒果糯米糍顶顶肚先，根住行过有个姐姐介绍食海鲜。佢话278有三个𩠌，海鲜小菜都可以，任拣。佢仲话送炒菜同汤。我哋见都多人食，姑且试吓。菜心同粟米羹系送嘅，另外我哋叫咗姜葱鲍鱼，粉丝蒜蓉蒸扇贝同清蒸䲝鱼，另外叫多咗个白饭同啤酒。先讲送𠮶两味𩠌，菜心都算鲜甜，而且份量唔算少。个粟米羹都算几好味，每人有两碗够晒饱肚。蒜蓉粉丝蒸扇贝，系细粒啲，但系都新鲜；粉丝同蒜蓉都好味，而且有六粒都唔算少。姜葱鲍鱼每人都有两粒，味道算唔错。至于条蒸䲝鱼，简直系点睛之作，大条又多肉，蒸嘅火候啱啱好；条鱼都好嫩滑。埋单共收327。我哋食得好开心，加埋个开阳海景，性价比甚高。食完嘢我哋经北帝庙上咗去北眺亭，行吓山沿途风景好靓，来回行咗一个钟，轻舒脚头够晒写意。