扒王之王 (已結業)

长老想食铁板餐，要求坐得舒服，冷气唔好太大吹亲佢。餐厅职员安排我哋坐近门口的卡座，令长老相当满意，我就劲钟意个怀旧feel。长老睇到餐牌有猪手，即刻放弃铁板餐。叫咗个汉堡扒蒜汁猪手配薯菜，万一猪手太硬食唔到，仲有汉堡扒替代。午餐跟罗宋汤、餐包同热饮。汤够热、料多、香浓，唔系水汪汪；餐包有热感，搽牛油落去冇耐就溶晒入包。食晒呢两样嘢，已经饱饱地。猪手出场时，长者第一时间食炸薯条，赞够脆，不过洒盐唔平均，一条咸，一条淡。至于猪手，好够腍同入味，长老全部食晒。汉堡扒有种手搓扒的风味，可惜煎㶶咗少少，但无损味道，多啲肉汁会更好。另外叫咗焗鸡扒饭，用炒饭底，鸡扒正常大细；酱汁有番茄、芝士、蘑菰、西芹、甘笋、洋葱，用料比大快活的丰富得多（当然价钱有差距）。同长老分享啲饭，佢自己加啲猪手汁落去，食晒成碗。奶茶有茶香，喜欢。隔离枱食客都系老友记长，佢食唔晒个餐，自备外卖盒带走。店员对长者都好体贴，不时问使唔使加水、帮手清走碗碟，服务周到。长老听到邻枱传出铁板餐独有的淋汁咋咋声，约定下次嚟食铁板餐。