影片
更多
2012-09-13
75 浏览
啱啱睇完套法国电影「闪亮人生」，真人真事改编，故事几轻松有趣，结局又带几分感人。剧中两位主角，一个有钱到不得了因跳降伞意外导致几乎全身瘫痪嘅白人，另一个穷到裤穿窿刚出狱嘅黑人，两人由幽暗无望嘅生命，因偶遇成为主仆，擦出友谊火花，令人生逆转，闪亮出第二个精彩人生。我嘅际遇就当然无咁神奇，工作依然劳劳碌碌，所以叹个优质嘅下午茶嚟闪亮吓我嘅人生先！除咗同老婆，仲有约埋另一对夫妇齐齐嚟食， Ivan兄就喺以前一齐学整甜品、学整面包嘅同学仔，因为佢都好有兴趣试吓依个「茶水间」嘅出品，食完佢哋就话顺道朝圣吓希慎添。饼店位处名店坊食街内，睇名就知主打面包同冻饼，铺内左边一排排籐篮放满各式各样欧陆面包；正中间就喺有成廿多款嘅饼柜，款款都只会摆得几件，有啲仲标示「售罄」添，店员话为保持质素新鲜，唔会太大量制作；最右边有个小雪柜存放咗啲樽装冻饮。如要堂食，就要晌铺外嘅露天位，有晒簷蓬唔怕落雨，不过唯一唔好喺露天位可以吸烟，去到啱啱得番一张枱，点知前后有几名烟民夹攻，无奈！店员Tracy见我哋有啲唔知点算嘅时候，问我哋介唔介意坐晌铺角另一边巷仔，地方更阔落，只喺无咗道簷蓬，反正无落雨无所谓，「拿拿淋」帮手开
除咗同老婆，仲有约埋另一对夫妇齐齐嚟食， Ivan兄就喺以前一齐学整甜品、学整面包嘅同学仔，因为佢都好有兴趣试吓依个「茶水间」嘅出品，食完佢哋就话顺道朝圣吓希慎添。
饼店位处名店坊食街内，睇名就知主打面包同冻饼，铺内左边一排排籐篮放满各式各样欧陆面包；正中间就喺有成廿多款嘅饼柜，款款都只会摆得几件，有啲仲标示「售罄」添，店员话为保持质素新鲜，唔会太大量制作；最右边有个小雪柜存放咗啲樽装冻饮。
如要堂食，就要晌铺外嘅露天位，有晒簷蓬唔怕落雨，不过唯一唔好喺露天位可以吸烟，去到啱啱得番一张枱，点知前后有几名烟民夹攻，无奈！店员Tracy见我哋有啲唔知点算嘅时候，问我哋介唔介意坐晌铺角另一边巷仔，地方更阔落，只喺无咗道簷蓬，反正无落雨无所谓，「拿拿淋」帮手开枱拎凳，因为依边位感觉仲正仲开扬，更无铺面正门啲位咁逼添。
冻饼实在太多款式，样样都做得别出心裁、精巧的骰，真喺花多眼乱款款都想试，几难抉择下卒之拣咗4款，再加三杯冻饮。落单后所有嘢都会由店员送上，大可安心返埋位等食。由于若将每件冻饼都一开四比较麻烦，所以我哋两家人，每款冻饼一开二简单啲，各自分享就可以喇！
红豆绿茶蛋白卷 $32见好多食家都赞，点都要亲身试吓架喇！好少做卷蛋个卷心落咁少忌廉，少忌廉合晒老婆口味，就算面层嘅忌廉，食落少甜轻柔，加上佢真喺偏爱红豆绿茶依个好和式组合。绿茶海绵蛋糕较实在，唔会食落太过一阵风咁，但口感依然软绵；有啲饼铺想绿茶味够强，有时会弄巧反拙，出嚟味道会浓得嚟带苦，而今次所食到嘅绿茶味够出之余，有种茶香韵味，正。红豆，铺满整个卷心，保证啖啖满口红豆滋味，加上红豆香甜。
无花果芝士饼 $38粉紫色旋扭嘅外型，以特制喷枪做出紫色朱古力粉嘅绒面，卖相高贵典雅。我哋先嚟猜猜顶上嘅球体喺乜，破开后原来喺中空既白朱古力波，当然喺装饰大于一切。由下至上，有海绵蛋糕、无花果肉、红桑子啫喱、芝士慕丝；鲜无花果肉味道突出，虽然喺芝士饼，仲以忌廉芝士嚟做，但芝士味唔会好似纽约芝士饼𠮶种咁重，感觉较轻盈，所以芝士反而喺配角。总括咁讲，整体嘅配搭有种清新感！
果馅酥（苹果 / 芒果 / 香桃） $38平时我哋惯叫拿破仑，芒果就食得多，今回试一试香桃。你见饼柜只有一件做样板，主因原来依款甜品喺即叫即做，提高酥皮嘅香脆度。酥皮个质素，确喺有一手，每层酥皮都好有牛油香酥，而且极之松脆，最特别喺面层酥皮撒咗啲黄糖嚟焗，有种麦芽、焦香嘅味道，初时我哋仲以为加焦糖！而吉士加入原条云喱拿煮，带有好多点点云喱拿籽，所以除蛋味，仲有轻轻一朕天然云喱拿味；至于里面，吉士之上铺满香桃，果肉清甜！
红桑子牛奶朱古力饼 $40依个冻饼，喺小弟第一眼就好想试嘅款式，个饼细心数，一共有成7层，事后问过饼厨黎师傅，原来要花两日时间嚟制作。初头食落有朕榛子味，好似金莎朕味，以为加咗榛子，原来系饼底加咗杏仁粉，仲有脆米，所以口感既香且脆。而当中几层浅啡色喺牛奶朱古力慕丝，中间一长形条只喺简单一朕红桑子啫喱，再数上去仲有一层朱古力脆脆。个饼除咗层次多之外，仲有一个亮点，就喺饼面嘅镜面朱古力浆，手工真喺一流，色泽够闪𫞠，平滑无起泡，质感够柔滑，厚薄啱啱好。做法喺易学难精嘅嘢，先雪冻个饼，溶好嘅朱古力浆控制好合适温度，撞落个饼度，利用个饼嘅冷温，凝固返啲朱古力浆，做成一朕柔滑嘅镜面朱古力。我哋间中玩吓整饼就知，如果朱古力浆温度控制得唔好，唔够热嘅话，倒落去唔流开，又或出嚟层浆过厚，相反，过热会搞到好泻身，化晒个饼四周，做唔成层软浆，仲记得以前学整「歌剧院蛋糕」（Opera），真喺搞到捩咁弃（音：呢咁hea）。想番起，比起𠮶时晌湾仔永丰街ēpöch食到嘅7 Layer Valrhona Chocolate Cake，觉得有过之而无不及，单单讲番件饼，口感纷陈，净系睇手工咁繁复都值回票价啦。所试嘅4款饼之中，佢喺小弟至爱啰！
讲完啲饼，又讲讲啲饮品先。因为老婆唔好冻饮，其实依度有供应花茶，不过又唔喺太想饮，所以孖埋我饮咗一杯冻啡，另外两位朋友就各自各精彩。冻意大利鲜奶咖啡 $36
其实咖啡我都喺首选热饮，因为热饮先真正感受到𠮶份香浓细滑、醇香回甘，不过，天气有点热，晌度又只有露天位，改饮一下冻嘅意大利鲜奶咖啡。虽然咖啡香味犹存，始终加咗冰块，令醇滑度打咗折扣，所以，今匀杯咖啡唔讲太多！
Blueberry Smoothies $36、Kiwi Fruit Smoothies $34晌网上帮Smoothies揾咗个中文译名「思慕雪」，音译得嚟几有思意，我都几钟意依个中文译名，我打食评尽可能都用中文去描述，以广东话形式就想令人读起嚟更亲切，就好似小弟亲口向你介绍美食，题外话讲多咗，返番嚟啲思慕雪度。成份大多数离不开蔬果原材料、蔬果汁、牛奶、酸奶或者乳酪、冰粒，而晌度卖嘅思慕雪，就以新鲜生果、乳酪、蜜糖、冰粒打成，选用蜜糖自不然希望杯思慕雪更天然、更健康啦，比例要视乎打边只生果，因为只只生果含水份都唔同。见到佢哋两个都话杯嘢唔错，当然我又想试啦，问问店家有无纸杯仔，喺有嘅，倒少少试一试。视觉上已令人觉得充满新鲜果肉，先试蓝莓思慕雪，见佢色水咁深紫，但蓝莓味无想中咁浓，反而后试嘅奇异果思慕雪，奇异果味相对突出好多，带酸，炎夏一饮，感觉凉快醒神。除味道外，质感圆滑，带有少少微细果肉，但又唔会好似思乐冰、沙冰咁有粒粒碎冰口感，冰冻得嚟唔会太冰冷，冻到牙都酸，夏日降温推介。
享受紧个下午茶期间，遇到饼厨黎师傅，当然趁机问咗所试几款冻饼嘅问题啦，好似上面件红桑子牛奶朱古力饼，特别多嘢想知。仲有其他有关整饼衰咗嘅问题，黎师傅有问必答，真喺获益良多。而店内服务员温文有礼，服务几贴心。
蜂蜜合核丹麦酥 $32（全条） / $17（半条）
丹麦方包近年都几热门，尤其博洛利亚嘅出品。既然店名叫得“Bread & Pastries”，见佢哋冻饼做得咁上乘高质，所以又再试吓佢啲面包，拣来半条蜂蜜合核丹麦酥，可以叫店员切片。包内合桃唔多，只喺搓好个丹麦方包落壳后，晌面面加入合核粒再烘焙，所以，只有包面有少少合桃。其实都见到面包内嘅层次，整体都好松软，富牛油香，不过个人对丹麦方包要求高啲，感觉未去到一层层如手撕种酥化。不过，都喺试咗佢哋一款包，评价佢嘅面包出品自觉未够全面，等有机会试多几款先再分享。
除冻饼同面包，店家仲有出品曲奇、蝴蝶酥，以及为应节嘅自家品牌迷你奶黄月饼，后者就无机会试喇，但前者嘅曲奇同蝴蝶酥倒有一试嘅机会，因为晌面包架侧仲有一个货架，摆卖多款袋装或礼盒装曲奇同蝴蝶酥，下面放有一个个玻璃瓮，一共7款曲奇及1款一口蝴蝶酥任君试食，每个瓮都要揭盖兼且侧跟有个小钳，试食得嚟都卫生啲。大致上曲奇口感松化松脆、渗出牛油香气有水准，众多款式里面小弟较喜欢一口蝴蝶酥、红莓杏仁曲奇、咖啡合桃曲奇、斑兰榔丝曲奇，黎师傅透露，话曲奇都喺即日做，保证新鲜松脆。你又会钟意边款？一于去食件饼，叹杯思慕雪，再试试佢啲曲奇啦！讲开再讲，曲奇试食睇得出店家嘅大方，因为曲奇一开二，大大粒曲奇令人咁先食出佢嘅味道。
张贴
