影片
更多
2023-09-10
61 浏览
星期六朝早，落到楼下，见到美心门口出面贴咗通告，话于月中结业，见到咁嘅情况，谂住食埋个告别早餐啦，入到去，睇个餐牌，无样想食，再望下张张台都有人不特只，水吧仲有好几个人等紧，见到咁嘅情况，当然即缩，行过隔离谭仔，睇吓有无咩啱食。谭仔由佢起尖沙咀第一间舖头开始，一直都唔系我杯茶，所以甚少帮衬，早餐更加未试过。是日由出面望入去，得小猫两三只，入座率约莫两成，同午市情况大相迳庭，所以无咩期望，但从门口睇睇吓个餐牌，咦！佢个汤粉面早餐，唔单只有餐肉、火腿、鸡蛋呢啲例牌嘢，仲有猪膶同鲜牛肉可以拣噃，而且价钱又唔贵，双并汤面加热饮都只系$36，咁就一于入去叫呢个茶记甚少有供应嘅组合啦！入到去坐低，唔单只客少，就连店员都唔见有，就连收银个位都唔见有人，不过半分钟唔够，就有店员从厨房出嚟，咁我快快落单，叫咗个鲜牛猪膶丁面外，仲叫咗杯奶茶。可能由于无咩客嘅关系，上餐速度算快，唔使5分钟，碗面同饮品都已经送到，同午市要平均等15分钟相距甚远。奶茶个糖包系砂糖包，但我喜欢用啡糖配奶茶，于是问店员妹妹有无啡糖，佢话有，而且好有礼貌换畀我。先讲杯奶茶，质地算系滑，但茶嘅味道，我就唔系好接受到，佢未至于好似大家乐
谭仔由佢起尖沙咀第一间舖头开始，一直都唔系我杯茶，所以甚少帮衬，早餐更加未试过。是日由出面望入去，得小猫两三只，入座率约莫两成，同午市情况大相迳庭，所以无咩期望，但从门口睇睇吓个餐牌，咦！佢个汤粉面早餐，唔单只有餐肉、火腿、鸡蛋呢啲例牌嘢，仲有猪膶同鲜牛肉可以拣噃，而且价钱又唔贵，双并汤面加热饮都只系$36，咁就一于入去叫呢个茶记甚少有供应嘅组合啦！
入到去坐低，唔单只客少，就连店员都唔见有，就连收银个位都唔见有人，不过半分钟唔够，就有店员从厨房出嚟，咁我快快落单，叫咗个鲜牛猪膶丁面外，仲叫咗杯奶茶。
可能由于无咩客嘅关系，上餐速度算快，唔使5分钟，碗面同饮品都已经送到，同午市要平均等15分钟相距甚远。奶茶个糖包系砂糖包，但我喜欢用啡糖配奶茶，于是问店员妹妹有无啡糖，佢话有，而且好有礼貌换畀我。
先讲杯奶茶，质地算系滑，但茶嘅味道，我就唔系好接受到，佢未至于好似大家乐咁偏酸，但个味道唔似一般茶记饮到𠮶只味，我会形容系味道怪怪，但未至于抗拒，当然，基于我唔希望浪费食物嘅原则，所以最后都一饮而尽，但下次再帮衬嘅话，好大机会会转饮其他。
至于碗面呢，第一啖时，面质偏硬，明显未熟透，咁可能同出餐速度快有关，但亦可能系考虑若果啲面如果一开始就煮得熟透嘅话，随时间转变，到个客食到最后会过熟，唔好食，所以宁愿煮得生啲都未定。点解我会咁理解，因为我食到差唔多最尾嘅时候，啲面真系熟透，质地符合我要求。
鲜牛肉煮得过熟，嚡口，唔得松软，可能佢无完全腌制过都未定；相比之下，猪膶就好食得多，软绵绵咁，唔会太生，有血水出，亦唔会过熟，硬口柴皮，煮得恰到好处，直得推荐。
而成个餐最精彩嘅，肯定系个汤，咪以为味精汤一定唔好饮呀，即使味精汤，原来都可以好好饮㗎，呢个汤除咗有丁面嘅汤外，由于猪膶会用姜丝腌制，姜丝配丁面汤包，原来系咁夹，咁好饮，所以我都多忍唔住饮几啖。
话就话屋企煮平过出街食啫，但若果忽然想食碗猪膶面，唔通会买嚿猪膶返嚟煮几餐？但我就肯定唔会咁做，一嚟腌制功夫未必到家，更重要系好多食材唔可以摆起雪柜太耐唔食，所以对于偶然一次食，又唔可以摆太耐嘅嘢，我宁愿出街食。
最后值得一提嘅系，我帮衬呢间谭仔，啲店员好有礼貌，会讲欢迎光临呢类客套话，清洁张台嘅速度好快，食完无几耐就即刻收拾好，而且做嘢速度亦快，唔似得两大一美及老麦咁，迟迟无人嚟清理，即使有人清理，个速度好似乌龟咁慢。食完早餐，返到屋企同家人讲，佢都同意我话呢间谭仔员工好有礼貌嘅睇法，原来呢间分店，唔单只朝早无乜客时咁有礼貌，即使中午繁忙时间，啲员工都好有礼貌，抵赞！
估唔到小猫两三只嘅谭仔，原来可以系开心大发现，我谂呢间谭仔，我好大机会再嚟食早餐。
张贴
