影片
更多
2012-01-11
382 浏览
承蒙姨仔之福，有机会走嚟一试「华商银行公会」嘅点心同炒粉面。星期日，太太𠮶边要去薄扶林扫墓，一大家人先过嚟中环汇合，食完晏仔先出发，姨仔系依度嘅会员，所以提议晌度食，贪佢够静局，骚扰少，况且食物质素不赖。仲有就系依餐免费，因为姨仔话出咗花红，由佢请，真系姨仔万岁。华商银行公会属私人会所性质，供华商会员银行及其属下嘅银行员工使用，但其实入会都唔算太难，都系俾少少会费啫。虽然叫私人会所，但环境犹如中式酒楼，楼底矮矮，比一般酒楼感觉仲要迫少少，但星期日嘅中环，中午时段本身已经唔多人，更何况依类上楼嘅中菜「私人会所饭堂」，我哋系第一枱客，食咗成个钟，计埋我哋全场都系得两枱客，清静得紧要，真系好少饮茶咁宁静，所以，如果三几个老友，又想叹吓点心，又想静静哋倾吓偈，依度算得不二之选。一入门口嘅告示板，就印有「招牌名菜」同「厨师特别介绍」嘅推介，另外，仲有一个菜谱，包罗多款小菜及炒粉面饭。依趟饮晏昼茶，点心系主打，所以睇点心先，点心纸一张过睇晒，分两大类：「蒸益求精」同「甜得有营」，前者一共罗列咗20款点心，后者就系5款甜品。点心价位唔平，特点$34，顶点$29，大点$25，中点$21，小点$18，茶
华商银行公会属私人会所性质，供华商会员银行及其属下嘅银行员工使用，但其实入会都唔算太难，都系俾少少会费啫。虽然叫私人会所，但环境犹如中式酒楼，楼底矮矮，比一般酒楼感觉仲要迫少少，但星期日嘅中环，中午时段本身已经唔多人，更何况依类上楼嘅中菜「私人会所饭堂」，我哋系第一枱客，食咗成个钟，计埋我哋全场都系得两枱客，清静得紧要，真系好少饮茶咁宁静，所以，如果三几个老友，又想叹吓点心，又想静静哋倾吓偈，依度算得不二之选。
一入门口嘅告示板，就印有「招牌名菜」同「厨师特别介绍」嘅推介，另外，仲有一个菜谱，包罗多款小菜及炒粉面饭。依趟饮晏昼茶，点心系主打，所以睇点心先，点心纸一张过睇晒，分两大类：「蒸益求精」同「甜得有营」，前者一共罗列咗20款点心，后者就系5款甜品。点心价位唔平，特点$34，顶点$29，大点$25，中点$21，小点$18，茶芥加一就唔使多讲啦。一口气落咗10个点心，加两个炒粉面，其实都好够饱，但临尾姨仔极力嘅推介，就再试埋佢个红豆糕同焗布甸，哗！搞到夜晚𠮶餐都要拖晏少少先食呀！
生煎菜肉包（特）生煎包个子都几大个，底面都煎得甘香，而且撤满芝麻；菜肉馅以猪肉、椰菜加少少葱做成，味道唔错，肉馅无死死实实。
麒麟马拉糕（小）质感松软，味道清香，手功扎实嘅一件古法马拉糕。后尾上网翻查，何解加上「麒麟」二字，原来老一辈师傅蒸糕时会敲一敲蒸炉，令糕面呈现麒麟纹（大概有啲似鱼鳞一片片咁），而麒麟有祥瑞之意，都系攞个意头。不过，今日眼见嘅马拉糕，得几条绉纹咋㖞！
蚝皇叉烧包（中）
包身咬落有弹力，唔死实，一搣开热气腾腾，最正系啲叉烧，入味唔肥又够多献汁。
古法牛肉球（中）
牛肉打得松弹唔死实，味道平稳。
开洋糯米包（小）糯米包依款点心依家少见咗，难得依度有就要点番一笼啦。皮薄烟烟韧，馅料丰富，糯米软糯入味。
蚬芥鲮鱼球（特）
虽为特点，但都贵得有理。鲮鱼球鱼味浓，肉质很弹牙，炸得够金香。蚬芥咸鲜，蚬味突出，轻醮已足够，太多会过咸。
蝉衣鲜虾腐皮卷（特）「蝉衣」又夸张啲，不过改用腐皮当春卷皮咁用，做成炸腐皮卷，一样咁香脆，咬落咯咯声，用料新鲜，虾肉鲜甜。
生煎蒲鱼藕饼（特）平时食藕饼多数用鲮鱼，今回用蒲鱼，查实对蒲鱼唔系好认识，都唔多知系咩鱼，所以鱼味方面就唔讲，讲番个藕饼。藕饼煎得唔会易散开，底面带脆，莲藕味十足。
芝士海皇春卷（大）对比起碟蝉衣鲜虾腐皮卷，依个芝士海皇春卷较为平淡啲。海皇都系啲碎湿湿嘅海鲜料，芝士唔多，味道唔突出。
马拉盏龙须（大）以马拉盏煮鱿鱼须，OK无乜惊喜，因为马拉盏差唔多等同我哋常用嘅虾酱。鱿鱼须煮得够腍唔韧，而小弟就较钟意金银蒜蒸，惹味啲！
蛋白海鲜炒饭
佢啲炒粉面份外大碟，好似依个炒饭，堆到成个小山丘咁。而个炒饭本身都几足料，海鲜有带子有虾，配啲甘笋粒、葱粒、菜心梗切片，加蛋白炒，饭粒爽身，唔会食到碟底一摊油。
三丝炒面同样又系一碟足料嘅炒粉面，堆到满泻咁滞。有肉丝、冬菇丝、银芽……等等，面饼炒得「外脆内软」，不过，咁都系三丝炒面嘅基本，所以，都系功夫扎实平稳。
椰汁红豆糕（小）椰汁糕加红豆粒，一客三件，椰汁味几浓，不过，依家多数都系用罐头椰汁处理。而红豆好少，且分布唔平均，仲有糕身有少少削。
莲茸西米焗布甸（中）落单后要等十多廿分钟，不过都值得㖞，因为真系好食。卖相已经似模似样，布甸很香蛋味，而莲茸竟然系白莲茸，在布甸底部，柔滑而唔会过甜，正呀！
大家都食饱饱，起锚要出发喇！
张贴
