Elmo's Bistro & Bar (已結業)

朋友系湾仔返工，约左收工吹水hea下，推介左Elmo’s Bistro & Bar。地方唔大，但开放式厨房，野食即叫即整，新鲜热辣，仲好方便吹水。一坐低即送上香脆法包，可以点上健康黑醋加蒜蓉，好正好高级。点左杯orange iced tea，用上茶包即冲，之后加入两大块鲜橙，新清开胃又唔甜，感觉好健康。话明吹水，蒜蓉薯条同黄金鸡翼冇走鸡。薯条比较粗身，加上生蒜蓉连同香草，入口首先系生蒜蓉既香同辛辣，之后有香草淡香，最后先食到薯条本身既油炸香味，第一次食有生蒜味薯条感觉好特别，好回味。黄金鸡翼做到都好出色，鸡翼一开为二，方便食客，而且更入味，用压碎左咸蛋黄包住鸡翼，所以好香浓，咸蛋黄一啲都唔咸，鸡翼肉汁都算丰富，鸡肉都嫩滑，令人忍唔住一只驳一只系甘食。最后叫左碟牛肋骨，布碟好精美，除左沙律外，更有小露笋同车煎过车厘茄，以及炸薯，好饱肚。牛肋骨淡淡粉红色肉汁好吸引，因为汁锁得好，所以七成熟肉质都几松软，不过下次可以试五成，应该更鲜嫩。整体上，食物有保证同新鲜，又方便吹水，算你一个唔错既新落脚点。