Izumi Curry (已結業)

周末放假係旺角行街，差唔多食晚飯，周圍都人頭湧湧，排哂長龍。呢一間日本咖哩餐廳就映入眼簾，相比其他餐廳，比較人少，等一陣就已經有得入座。睇完MENU後，分別叫咗「芝士牛舌咖哩飯」同「IZUMI牛肉咖哩飯」。日本餐廳有一點係好好，就係有濕紙巾比你抹手嘅傳統，清潔好雙手先進食。抹完對手，話都未講完個前菜同飲品就到。基本沙律菜加左麻醬，個人覺得價錢送前菜同飲品，都幾公道。好快個咖哩飯到，無特別去柯打唔辣或者大辣，揀正常辣我呢種唔食得太辣嘅人都接受到。飯同汁嘅比例可以話係一比一，一啲都唔孤寒，唔怕食到半路無哂咖哩。至於咖哩味道都算係相當日式嘅咖哩味道，辣甜咸都調配得好容易入口，個人覺得係有層次嘅味道。飯就係真日本肥仔米，份量適中。另外講下啲芝士同牛舌，牛舌嘅肉質易於入口，又無炆得太老而嚼唔到啵；芝士就個人喜好啦，覺得多一份口感同拉芝士嘅喜悅，所以推唔推薦加芝士：隨心吧。總結，香港只係專食日本咖哩飯嘅餐廳，好似愈來愈少，相比起曾經開到遍地日本餐廳嘅時代。而呢間連鎖店嘅味道都平穩及價錢適宜，係咁人潮湧湧嘅晚飯時段，都值得食個便飯。