影片
更多
2011-03-14
70 浏览
好耐无入嚟新城市广场依边食饭喇，就番其中一家，所以入咗嚟。趁著做冬，又可以一家人围埋食番餐好嘅，今次拣小南国，无非都系贪佢水准稳定有质素，而且又有个阖家欢超值精选八人餐（原价$1,728，折实$1,488，未包茶芥），人数啱晒，菜单又有佢哋嘅几款招牌菜，符合晒我哋嘅要求！小南国在港亦扎根多年，走嘅系中高档路线，所以装修、服务、食物质素都一向属佳品，晌度食饭几稳打稳扎。加上今晚主打都系嚟做冬，爆场都系定律，分两轮都系饮食业揾钱嘅自然做法，早啲食早啲走啫，返到屋企都唔使搞咁夜。一室象牙白主调，带有通花嘅天花，晶莹剔透波波水晶灯，都令环境雅致不俗套。未上菜，先嚟一人一杯清润雪梨水，晌依个冬日添添滋润，总好过次次都系啤酒汽水，如果有得添饮就仲正！前菜五小碟5款冷盘前菜碟碟都做得几骨子，加少少伴碟，观感已好唔同，包括有：花雕醉鸡、金瓜丝海蜇、凉拌茄子、四喜烤夫、糖醋小排骨，各具特色，5款都做得好食。- 醉鸡带微微酒香，唔会盖过鸡鲜味，皮爽又肉滑。- 金瓜即系南瓜，金瓜同海蜇都切成幼丝，望住丝嘅幼而修长，都睇出师傅刀功上乘。金瓜丝同海蜇丝都做到质感脆身，添少许麻油捞捞，不其然夹完一炷又一炷。- 茄
小南国在港亦扎根多年，走嘅系中高档路线，所以装修、服务、食物质素都一向属佳品，晌度食饭几稳打稳扎。加上今晚主打都系嚟做冬，爆场都系定律，分两轮都系饮食业揾钱嘅自然做法，早啲食早啲走啫，返到屋企都唔使搞咁夜。
一室象牙白主调，带有通花嘅天花，晶莹剔透波波水晶灯，都令环境雅致不俗套。未上菜，先嚟一人一杯清润雪梨水，晌依个冬日添添滋润，总好过次次都系啤酒汽水，如果有得添饮就仲正！
前菜五小碟5款冷盘前菜碟碟都做得几骨子，加少少伴碟，观感已好唔同，包括有：花雕醉鸡、金瓜丝海蜇、凉拌茄子、四喜烤夫、糖醋小排骨，各具特色，5款都做得好食。
- 醉鸡带微微酒香，唔会盖过鸡鲜味，皮爽又肉滑。
- 金瓜即系南瓜，金瓜同海蜇都切成幼丝，望住丝嘅幼而修长，都睇出师傅刀功上乘。金瓜丝同海蜇丝都做到质感脆身，添少许麻油捞捞，不其然夹完一炷又一炷。
- 茄子切得长短匀一，又索足酱汁，加埋瓜身水份，咬落去汁液丰盈，软腍度又适中。
- 烤夫（正写为「烤麸」），好似海棉吸收晒酱汁，够晒入味，甜中带咸，四喜通常指用金针、木耳、鲜冬笋、香菇，依个就用咗金针、木耳、毛豆，顶多只可叫三喜㖞！
- 小排骨，排骨的的骰骰，主要食个糖醋汁，甜酸得嚟唔呛喉。
清炒河虾仁可能你会嫌佢个卖相清得紧要，但神髓在于此。虾仁虽然比较细粒，但炒得粒粒晶莹，挑晒肠，夸张少少真系白里透红，既然清炒就系食佢河鲜味，所以虽有醋佐点，但都入口斋食，味道鲜甜清爽，再搞多啲「花臣嘢」，就破坏佢清炒之名。
砂窝云吞鸡滔起位上，每位两粒云吞加棵小棠菜，汤头色深鲜甜有鸡鲜味，唔油腻；云吞以鲜虾猪肉为本，包得大大粒，稳打稳紥。鸡肉另碟上，虽然只鸡系用作滚汤胆，但比预期中唔算点嚡，点点豉油我都食咗唔少。
椒盐小黄鱼
记得以前都系晌小南国食嘅小黄鱼无依家咁大条，所以，叫小黄鱼都唔多贴切。八人餐，一大碟共八条，唔使分，依然出色嘅小黄鱼，就系皮脆肉嫩，师傅日日都唔知要炸几多条，相信失手都机会细啰！
蟹粉烩鱼肚今餐无鲍参翅，有个肚（花胶），都几好㖞。鱼肚我就视佢为高档猪皮，依句都系讲笑啫，两者价钱差好远，以前听朋友讲，有啲无良酒楼真系猪皮扮鱼肚架。鱼肚本身无乜味，重点在于佢嘅滋补价值，所以要揾啲相对味浓嘅汁酱嚟扣或烩。依碟鱼肚烩得够腍，咬落少少爽口，唔腥唔潺，配合蟹粉，无疑令个鱼肚更贵气，但足量嘅蟹粉令每啖更滋味。（题外话：原来猪皮本身都有好处，就系加速伤口埋口，不过食得多会吸收过量胆固醇。）
元蹄伴棠菜期待嘅菜式，因为真系好难得食元蹄，平时散叫唔会点依道菜，通常啲人都话怕肥。难得系个餐嘅指定菜式，可以食过痛快。元蹄红烧，酱汁非常浓稠，成只元蹄都挂晒汁，一刀切开，清楚见到表皮、皮下脂肪、蹄肉。表皮软腍，好似食紧肉冻咁；脂肪望落去就一定觉得肥，但食落唔算油；蹄肉被啲肥膏包住嚟炆，自然够晒腍滑，所以就被大家抢得快，此外因为系全肉，无乜肥膏，点点酱汁就好好味。
上汤时蔬其实都唔系点上汤，反而系一个加咗蛋白嘅厚「献」，时蔬主要用菜心，加咗啲茶树菇做点缀，只系为个套餐平衡吓，而作出嘅清菜间场，菜心鲜嫩，都OK嘅。
灌汤生煎包通常套餐，总系临尾安排粥粉面饭，势要客人饱到捧住个肚走，但今次个餐系以灌汤生煎包代替往常嘅饭面，仲得我欢心，因为上面都食咗唔少嘢啦，真系饱得九乘十乘，来个灌汤生煎包倒有点特色。包底煎得香脆，包身松软，猪肉馅亦腌得够味且打得松化，唯「灌汤」有点不足。
桂花拉糕拉糕亦即系上海年糕，系上海传统食完年夜饭嘅饭后甜品，与「拉高」谐音，希望新一年晌财富同地位可以「拉高」「拉高」云云。蒸好嘅拉糕，加啲桂花糖，入口软绵烟韧黏牙，虽未至于齿颊留香，但桂花糖唔太甜带有清香。
冬又好，团年又好，阖家欢．开开心心食一餐，咁就已经好好！
张贴
