蛇王祖萍記豆品小食

营业中

休息中

今日下午我们喺粉岭联和墟食完猪手面之后，行过联安街见到有间食蛇羹嘅「蛇王祖萍记豆品小食」都几多人食，所以我们就入咗去食返碗蛇羹！我们叫咗个抵食套餐：大五蛇羹拼腊味糯米饭！大五蛇羹嘅蛇肉份量都几多，汤底嘅味道亦好鲜味，而且浓稠度亦调教得恰到好处，唔会过稠或过稀，再加埋啲柠檬叶一齐食，简直系绝配呀！腊味糯米饭嘅糯米非常烟韧软熟，唔会过腍或过硬，而腊肠除咗舖满𠮶几片之外，仲有切成粒装之后捞入糯米饭入面，令到腊肠嘅油香味完全渗透晒啲糯米饭度，所以味道真系相当芳香惹味！原片芒果宾仔糯米糍系即时喺现场整，每次整完一批之后都好快卖晒，我们都要等第二批先有得食，一嚟到𠮶阵我们就觉得好特别同好吸引，因卖相系一个有一只手掌咁大嘅鹅蛋形咁，咬开一半就见到入面原来系原片厚厚鲜黄色嘅芒果肉，感觉真系超抵食呀，而且味道非常香甜，而且外层嘅糯米皮极之薄身，质感相当烟韧软滑，真系超正呀！石磨芝麻糊系用人手石磨，所以超级香滑浓郁，有极之芳香嘅芝麻香味，真系真材实料呀！