德國餐廳 (已結業)

系平安夜晚买左戏飞系Element睇戏，无订位确实好难揾到位食野，所以就同朋友一齐行番去渡船街果头揾好野食。其实渡船街真系有好多好野食，有选择困难症既我地，真系唔知点拣，最后好随意入左间德国餐厅食猪手同杂肠。朋友见到门口既杂肠觉得吸引，而我就俾猪手吸引左，所以我地就决定一试。落完order就猪手先上，皮脆到咬落去都听到声，肉都嫩滑，加埋一齐放入口，十分不错。碟边配上薯蓉同酸菜，就有D失色，薯蓉都尚算可以，而酸菜先系成个dish既灵魂，可惜就唔系正宗既德国酸菜，十分中国feel，又唔酸，放系猪手旁真系有d失色，因为牡丹虽好，但都需要绿叶扶持。之后上杂肠，一共有四款，全部都系猪或猪沟羊既肠，个人比较喜欢黑胡椒肠，少少辣味带番肉味，不错！相反朋友比较钟意芝士肠，咬落去都feel到有汁“支”出来，芝士味都重。相中最长果只，相信系猪沟羊，但可惜唔太吸引，味道都一般，而最尾一种就更加分唔到系咩肠，亦不太吸引。店内得一人管理，由落单到上菜到倒酒到埋单，都系佢一个人，店铺细细，但都可以handle到。