Lilium

营业中

休息中

今次食咗间位于鲗鱼涌嘅台式料理小店。呢个小店嘅位置相对比较偏僻，𠮶日去店里面唔算好多人，去到啱啱好有下午茶，一望觉得几抵就入咗去试吓。里面嘅装修都有少少文青Cafe feel，几舒服。同朋友每人嗌咗一个set，嗌咗卤肉饭同花枝丸配地瓜薯条。虽然系下午茶，但份量其实一啲都唔细。味道方面唔差，卤肉饭更加系用珍珠米，几有诚意。地瓜条同花枝丸食落热辣辣，应该系即叫即炸。另外有个沙律仔，几加分。见几平所以都嗌咗两份小食，生煎包同台湾肠。台湾肠就普普通通，同食开嘅台湾肠差唔多，不过都算几大条；生煎包真系几特别，扁扁地有少少似煎饼咁，但食落都会爆汁。而下午茶set系跟嘢饮嘅，我哋就嗌咗杯冬瓜茶同埋冻咖啡。冬瓜茶唔会太甜，唔错；冻咖啡都可以饮到咖啡豆嘅酸味，几好。总括嚟讲，个下午茶真系几抵食，而且静静地慢慢食冇人赶，如果喺鲗鱼涌想静静地食个tea，依度都算系个唔错嘅选择。