越翠苑

营业中

休息中

最近多咗出荃湾做嘢，偶尔经过一间望落几企理嘅食越南菜嘅餐厅，不禁引起我嘅兴趣。其实我对越南菜印象麻麻，记得好几年前食过连锁经营的芽Ｘ、越Ｘ等，感觉越南菜来来去去都系𠮶几味。直到我遇上呢间「越翠苑」。。。夜晚8点左右，喺好奇心驱使下，我入到去坐低，见食客唔多，我就慢慢揭吓个餐牌。哗～原来除咗捞檬和汤河之外，仲有好多其他越式选择。我第一次胆粗粗就点咗咖喱牛腩饭，外子就点咗个香茅牛肉河。食物好快就送到，热气腾腾。我份咖喱牛腩嘅咖喱汁好有椰香味，用筷子夹起旧牛腩，简直不得了！一夹即溶。我净系食过干柴嘅牛腩，从来都未食过咁软腍嘅牛腩，实在太正了！外子的香茅牛肉河，里面有九层塔嘅清新香味，钟意东南亚食品嘅人对九层塔应该非常熟悉。牛肉好有质感，河粉又滑捋捋，一下子就食晒了！隔咗几日再次回访，今次试吓佢个春卷捞檬同法包。春卷捞檬的料头多到满泻！里面嘅香菜唤醒味觉，好醒胃！法包外脆内软，配埋个咖喱汁简直一绝。小店只收现金，没有加一服务费。价格相宜又能提供美味食物，以后亦会经常帮衬的。另外，小店系逢星期一休息，唔好去到摸门钉哦！