Soul9+ (已結業)

锦屏街有唔少野食，一直冇时间去试下，甘岩朋友过来约吹水食饭，拣左Soul 9，贪佢够隐蔽，而且有室内外可以选择。野食选择唔算多，点左份柠檬芝士鸡翼，碟上布置好有心机，令人心情愉快，食指大动。清新柠檬味冲淡左油腻感，配上香浓芝士，一啖咬落去，鸡翼外面香脆，里面嫩滑，柠檬芝士味充斥成个口腔。我叫左白松露.海胆.新鲜鲍鱼.白酒意大利饭。顾名思义有齐甘多材料，一上台就闻到好香松露味，于是捞左一半饭。另一半留俾海胆捞，加拿大既海胆好大好正，细滑口感，入口即溶，加入饭度，令成个饭升华左，好香滑，配合左粒粒分明既硬身意大利饭，三者出奇合拍。最后新鲜鲍鱼，size大过汤羹，爽脆弹牙，原来只落左黑椒胆海盐吊味，但已经鲜甜无比。朋友既美国猪鞍.薯角.杂菜同样出色。切开手掌大猪鞍，里头系粉嫩色，证明师傅火候掌握好，肉汁丰富，肉身有嚼口而唔鞋口，忍唔住切左几块大快朵颐。唯一美中不足系甜品要下星期先有得供应。