AGE Cuisine Express (已搬遷) 新店位置

观塘工厦就去得多，但原来对面海同样有工厦美食😳。我同朋友喺太古行完街，唔想食商场连锁店，上网一揾之下就见到有间叫「AGE Cuisine Express」嘅餐厅。我肯定自己无嚟过，但又对餐厅名有啲印象，最后俾我醒起佢系我旧公司提供到会午餐嘅承办商！𠮶阵日日食佢都觉得好正，原来真身喺呢度😝，成个感觉好得意，又似曾熟悉。餐厅主打西餐🍽，款式都算几多。其实本身有谂过食Pizza，但佢成12吋两条友未必食得晒。再加上今晚唔肚饿，所以只系叫咗一个主食搭两个小食。慢煮半生M6和牛西冷配黑醋蜜糖芥未酱($138)，前菜卖相色彩缤纷🌈，厨师有花心思摆盘。主角西冷牛处理得唔错，系预期中嘅半熟，肉身呈粉红色，食落牛味都算浓，肉质唔韧🥩。18个月巴马火腿伴芝麻菜沙律($104)，意式风干火腿咸香十足🥓，虽然比较细块，但都能过吓口瘾。火箭菜唔重青味，反而仲好似渗出苹果甜香🍎。另外，伴菜仲有车厘茄同面包脆糠等。豚肉蕃茄干菠菜蕃茄忌廉汁扁意粉($118)，意粉几大碟🍝，每条都挂满酱汁，佢将蕃茄同忌廉混合为一，所以酸度同腻度都中和咗。扁意粉质感弹牙，加入菠菜同青瓜令口感更佳。🐷豚肉片系猪腩片，如果经煎香定必更香口。