Nomads (已結業)

Item: Nomads
Rating: 5
Author: Sabrinachan1038

154 食记

味道

环境

服务

卫生

抵食

5554

尖沙咀

$201-400

蒙古菜自助餐

110

Sabrinachan1038

等级1

香港有得食蒙古野嘅餐厅唔多，依间餐厅地理位置隐蔽，又改左个「流浪者」嘅名，觉得几浪漫，就系咁我就从此同佢结下情缘。

首先讲佢嘅装潢，设计好独特，欣赏佢大胆得嚟简洁嘅布置，加上舒服嘅毛毛凳、愉悦嘅民族音乐，俾人一种置身大自然嘅心身舒畅。员工服务态度良好，第一次嚟嘅会有职员介绍餐厅嘅运作。餐厅系自助餐形式，可以自己选择唔同嘅食材同配菜，交俾厨师即席表演铁板烧。

肉类除左有猪牛鸡同烟肉，仲有好出色嘅羊肉。血色够鲜红，脂肪比例恰到好处，炒出嚟羊味够重，酥而不膻，系一等一嘅新鲜。质素同稳定度都好高，非常之难得。海鲜方面有中虾、蚬肉、鱿鱼同埋龙利柳，相比起肉类就无咁特出，但系虾都几弹牙爽口。配菜亦都唔少，最令我惊讶嘅系餐厅非常之细心，会考虑到唔同嘅「文化」要用到唔同嘅蔬菜配搭，达到色香味俱全嘅效果。例如葱，佢都会有青葱、洋葱同紫洋葱，好啱我依d要求食得又睇得嘅心态。

所谓「文化」就系餐厅嘅重头戏，亦都系香港人嘅挚爱：混酱。佢嘅酱料并唔系普通嘅沙茶、生抽老抽，而系充满东南亚风味嘅蒙古酱、冬阴功酱、绍酒等等。佢仲会系上面介绍唔同文化嘅配搭，我个人就最钟意用蒙古特色炒羊肉，佢些微嘅香辣可以调出个种异国情调，但系又唔会盖过羊肉简单嘅鲜味。有时我都会创新一下，根据个人口味（同心情）随意配搭，食多食少悉随尊便。

除左铁板，佢仲有自制pizza，就系将上述嘅材料放系佢提供嘅饼底到，然后厨房帮你加芝士系面头焗。虽然我依个食肉兽已经无位食pizza，但系凭我多年叫pizza到会嘅经验，每次见到隔离枱个d样都好靓仔，绝对唔俾连锁店逊色。

系等师傅煮嘅同时就可以到隔嚟嘅自助bar拎食物，有前菜、沙律、海鲜、小食同汤。佢一个礼拜每日都唔同，虾同青口都好大只好新鲜，小食方面我就最钟意佢个ribs，真系好嫰，一咬就骨肉分离。基本上食三转已经饱晒，但系都一定要留位食甜品同生果。佢选择唔多但好够质，连我啊妈依个只系食shangri la嘅甜品精都对佢嘅木糠布甸赞不绝口，据佢形容：「木糠幼细香脆，布甸滑得嚟够浓密，口感一流。」至于生果，就一定系西瓜大热胜出，既解腻有消暑，可以为依趟美食之旅画上一个完美嘅句号。

虽然系铁板前面又热又辛苦，但系师傅都会笑笑口咁同客倾计。话说我唔小心变左熟客之后，师傅（好似听其他人嗌「吴师傅」，应该系老大）就连我去左边度出国都记得。上次我去嘅时候，佢知我钟意食芝士，特登焗左个心形pizza俾我地，非常有爱。芝士落重本，好似唔使钱咁，最难得系佢咁多芝士都可以做到饼底唔㶶芝士又够融，完全做到拉丝嘅效果。以为已经去到天堂，师傅又送多个甜品嚟。今次佢卖相简单，只系一个面包圈，上面有一个朱古力雪糕。哇。食落先知非凡，简直系人不可貌相。个doughnut有传统西式炸面包烟韧松软嘅口感，但系又无佢庸俗嘅死甜，反而混合左油炸鬼嘅淡香。而上面嘅雪糕简直系经典。平时嘅蛋糕即使系haagen dazs，都系用水同奶一齐churn，所以难免会有少少冰味。但系佢个雪糕系滑到好似净系得奶咁，一d冰感都无。一浓一淡、一滑一韧，朱古力慢慢渗入面包嘅缝隙再融合为一，两者无论系味道定系质感，都可以做到相辅相成，简直就系perfect match。如果佢有得卖，我可以好大胆咁讲，放酒店嘅价钱都不足为过。

作为一个食野极度挑剔又要求试新野嘅港女，依间野的确令我非常之impressed，忍唔住一试再试，即使过左外国每次翻嚟都唔可以唔去。我觉得大部分自助餐一系就重量不重质，一系就厚此薄彼，所以要试餐厅通常都系fine dining为主。Nomads系唯一一间俾我同时享受自助餐嘅放肆、有质素嘅食物同埋煮饭仔嘅乐趣，从来无令我失望。