圓老爺雞煲小廚 (已結業)

突然想食鸡煲，于是上Openrice揾揾元朗鸡煲，揾到呢间圆老爷鸡煲小㕑。经常喺元朗一带揾食，经过附近都无留意到呢间隐世小店，见到食评全部都系好评，于是就去试下。原来小㕑就喺元朗广场天桥底附近，地点好方便易揾，附近又有停车场方便泊车。入到店内见装修都几新净，感觉整齐干净，员工个个都好有礼貌，招呼周到。我哋点了麻辣重庆鸡煲，后来见个星级原条牛肋骨好吸引，于是又叫埋，再叫左一碟小食手拍小黄瓜。麻辣重庆鸡煲卖相好吸引，加左芫茜上枱滚一滚就食得，员工好细心咁帮我地捞匀再焗一焗，煮滚之后又换番只碟垫底，热住食又唔会一边煮到干晒。鸡煲唔太辣都易接受，鸡肉好嫩滑，洋葱好爽好甜！星级原条牛肋骨好有惊喜，原条牛骨伴碟实在有气势，牛肋肉好肥美，腌得好腍好入味，配沙律菜食无咁腻。手拍小黄瓜好啱中和食肉嘅油腻感，酱汁微辣亦好开胃！加多支啤酒啤一啤！